Башҡортостан ирекмәндәре "Еңеү илселәре" тип аталған Бөтә Рәсәй конкурсында беренселек яуланы

Әүҙем йәштәргә Мәскәү, Санкт-Петербург ҡалаларында уҙасаҡ "Үлемһеҙ полк" акцияһын ойоштороуҙа үҙ өлөштәрен индереү мөмкинлеге бирелгән.

Альберт Вәлиев, Дамир Яҡупов һәм Ангелина Васильева - өсөһө лә Октябрьский ҡалаһынан. "Еңеү ирекмәндәре" төбәк хәрәкәте координаторы әйтеүенсә, Бөтә Рәсәй конкурсының маҡсаты йәштәр араһынан иң әүҙем, маҡсатына ирешеүсән егет-ҡыҙҙарҙы билдәләү. Башҡортостан ирекмәндәренең бәйгелә еңеп сығыуы, йәштәрҙең тыуған ил, ата-олатайҙар тарихына битараф булмауын күрһәтә.

“Әүҙем йәштәр сафына ҡушылыуыма 6 йыл. Быға тиклем республикала уҙған һәр бер сарала тиерлек ҡатнашып килдем. "Еңеү илселәре" конкурсында ҡатнашыу яңы дуҫтар табыу мөмкинлеген бирҙе. Санкт-Петербургта ойоштороласаҡ парадҡа Рәсәйҙең төрлө ҡалаларынан 100 ирекмән килеүе көтөлә. Һуңынан беҙ 10 командаға бүленәсәкбеҙ. Мин уларҙың күптәре менән социаль селтәрҙә аралашып торам”.

Ангелина Васильева, ирекмән

Автор: Фәниә Юланова.