Асфальт юлда ҡом һаҙлығы. Өфөлә йәшәүсе 71 йәшлек ханым ейәне менән Республика туберкулезға ҡаршы диспансер биләмәһендә бәләгә тарый. Юл участкаһында ятҡан ҡомға баҫып ҡараған малай ҡапыл бата башлай. Өләсәһе уға ярҙамға ашыға, әммә үҙе лә ҡапҡанға эләгә. Хәйер, яҡында үтеп барыусы кешеләр була. Улар соҡорҙан сығырға ярҙам итә. Билдәле булыуынса, өлкән йәштәге ҡатын умыртҡа һөйәген һындырған, әле дауаханала ята. Ейәне Дауыт менән беҙҙең ижади төркөм осрашты.
Хәүефле зона, үтергә ярамай. Республика туберкулезға ҡаршы диспансер биләмәһендәге ҡом һаҙлығы хәҙер кәртәләнгән, өҫтөнә, хатта, ҡырсынташ түшәлгән. Бәлә булырын алдан белһә, Давид был ҡурҡыныс урынды урап та үтер ине, бәлки. Тик иҫкәртеүсе билдә булмай.
Бәхеткә, яҡында ғына үтеп барыусы кешеләр була. Улар оло йәштәге ҡатынды соҡорҙан сығарып, бәләгә тарыусыларға учреждение эсенә инергә ярҙам итә. Дауыттың әсәһе Әлмира Әбләҙова был хәлде ишетеү менән диспансерға юллана.
Әле оло йәштәге ҡатындың хәле бер аҙ яҡшыра башлаған. Ейәнен бәләнән аралай алғанына һөйөнөп бөтә алмай ул. Әйткәндәй, диспансер биләмәһендәге соҡор өсөн "Өфө һыу каналы" предприятиеһы яуаплы булыуы асыҡланды.
"Өфө һыу каналы" предприятиеһында хәүефле участканы 1 майға тиклем тәртипкә килтерергә вәғәҙәләйҙәр. Шулай уҡ зыян күреүселәрҙең хат- мөрәжәғәтенә яҡын арала яуап буласаҡ. Ә әлегә оло йәштәге ҡатынға ҡиммәтле дауалау курсы талап ителә.
