Бөрө ҡалаһының Көньяҡ-көнбайыш, Телеүҙәк биҫтәләрендә йәшәүселәр юлһыҙ интегә. Батҡаҡ урамдарҙан урындағыларға ашығыс ярҙам машинаһы һәм башҡа хеҙмәттәр барып етә алмай. Уҡыусыларға мәктәпкә, бәләкәстәргә балалар баҡсаһына йәйәү йөрөү ҡыйынлыҡ тыуҙыра. Ошондай уҡ мәсьәлә менән Кушнаренко районының Субай ауылынан да беҙҙең редакцияға мөрәжәғәт иттеләр. Цивилизация ҡайҙа тамамлана?
Эшкә ике-өс сәғәт алдан сыҡһалар ҙа, файҙаһыҙ. Батҡаҡҡа әйләнгән юлдан "Нива" менән дә үтерлек түгел. Иң яҡшыһы тимер атты ҡалдырып, артабан йәйәү атлау. Бөрө ҡалаһының Көньяк-көнбайыш биҫтәһендә йәшәүселәрҙе йыл да яҙлы-көҙлө юлһыҙлыҡ мәсьәләһе борсой. Кибеткә, мәктәпкә барыу, хатта күршегә инеп сығыу ҙа улар өсөн ҙур ҡыйынлыҡ тыуҙыра.
Биҫтә бер нисә йыл элек төҙөлә башлай. Ер участкалары башлыса күп балалы ғаиләләргә бүленә. Һыу, газ үткән, яҡтылыҡ бар, тик бына юл ғына иғтибарҙан ситтә ҡалған. Ашығыс ярҙам машинаһы килә алмау, балаларҙың мәктәптә дәрес ҡалдырыу осраҡтары ҡаланың башҡа биҫтәләрендә йәшәүселәргә лә яҡшы таныш. Йәше, ҡарты мәсьәләне күтәреп, урамға сыҡҡан.
Юлһыҙлыҡ мәсьәләһе буйынса район хакимиәте етәкселеге лә хәбәрҙар. Уны хәл итеүгә әлеге биҫтәләрҙә бер-ике йыл элек газ үткәреү эштәре ҡамасауланы, тип яуапланы улар. Планда биҫтә урамдарына ҡырсынташ түшәү ҡаралған. Әлегә асфальт һалыу тураһында һүҙ бармай, юл мәсьәләләренә аҡса район бюджетынан бүленә.
Кушнаренко районының Субай ауылы халҡы ла юлһыҙ интегә. Уларҙың цивилизацияһы трассанан 500 метр үткәс тамамлана.
Яҙлы-көҙлө мәктәп автобусы, машиналар ауыл осонда ҡалдырыла. Сөнки батҡаҡ урамдарҙан үтерлек түгел. Юлһыҙлыҡ мәсьәләһенә күнеккән халыҡ резина итек кейеп ауылға йәйәүләп үтә.
Субай ауылында ни бары ике-өс урам. Үтерлек түгел, батҡаҡ. Бигерәк тә яҙлы-көҙлө, ямғырҙан һуң йәйәү йөрөүе ҡыйын. Хаҡлы ялдағылар ашығыс ярҙам машинаһы, табиптар килә алмауына зарлана.
Юлһыҙлыҡ мәсьәләһе менән Субай халҡы урындағы хакимиәткә мөрәжәғәт итә. Былтыр, ниһайәт, уларҙың аһ-зарын ишетәләр. Юлға ремонт эшләнә. Әммә түшәлгән балсыҡ хәлде, киреһенсә, хәлде ҡатмарлаштыра ғына. Ә әлегә ауылда йәшәүселәр яҡын киләсәктә юл мәсьәләһе көйләнер тигән өмөттә ҡала.
