Дүртенсе йыл рәттән ойошторолған сараға теләге булған һәр кем ҡушыла ала. Акцияла ҡатнашыу өсөн алдан теркәлеү талап ителмәй, шулай уҡ исем-шәрифтәрҙе күрһәтеү ҙә мотлаҡ түгел.
Юғары уҡыу йортонда әле күләмле сараға етди әҙерлек бара. Быйыл диктанттың тексы Мәрйәм Бураҡаеваның "Арғымаҡ" әҫәренән алынған. Тексты Мәжит Ғафури исемендәге Башҡорт дәүләт академия драма театрының художество етәксеһе, Рәсәйҙең атҡаҙанған, Башҡортостандың халыҡ артисы Олег Ханов уҡый.
Диктантты шулай уҡ онлайн режимда яҙырға мөмкин. Бының өсөн Башҡорт дәүләт университетының сайтына инергә кәрәк буласаҡ. Республика район-ҡалалары һәм күрше төбәктәр өсөн видеояҙма алдан яҙыла. Уны акцияла ҡатнашыусыларға бер көн алдан һорап алырға кәңәш ителә. Яҙма эш иртәнге сәғәт 10-да башлана. Башҡорт телен белеү буйынса белемен республика район-ҡалаларынан тыш, Мәскәү ҡалаһы, Силәбе, Ырымбур өлкәләрендә йәшәүселәр ҙә тикшереп ҡарарға теләк белдергән.
