Республика мәктәптәренең 95 проценты яңы уҡыу йылына юғары тиҙлекле интернет менән тәьмин ителәсәк. Әле Башҡортостанда ике йөҙҙән ашыу мәктәп интернетҡа бөтөнләй тоташтырылмаған. Йыл аҙағына тиклем барлыҡ белем усаҡтарын да заман коммуникациялары менән йыһазландырыу ҡаралған.
Был эштәр Рәсәйҙә дөйөм белем биреү учреждениеларын интернетҡа тоташтырыу проектына ярашлы башҡарыла. Бөгөн Хөкүмәт президиумы ултырышында Башҡортостанда ғәмәлгә ашырыласаҡ эштәр барланды.
Үрге Тәтешленең 1-се мәктәбендә математика дәресе. Белем усағы Рәсәйҙең "200 иң яҡшы ауыл мәктәбе" исемлегендә. Мәғариф учреждениеһы профилле белем биреүҙе өҫтөнлөклө йүнәлеш итеп алған. Интернет,башҡа электрон мөмкинлектәр бында киң ҡулланыла.
Бындай уңайлыҡтар менән республиканың һәр мәктәбе лә маҡтана алмай. Республикалағы 1954 мәктәптең ике йөҙҙән ашыуында интернет бөтөнләй юҡ. Был иһә электрон белем биреү системаһын үҫтереү эшен күпкә тотҡарлай. Ә бит виртуаль мөмкинлектәр көн талабы. Хатта, көндәлек тә хәҙер электрон форматта булыуы мотлаҡ. Күп кенә белем усаҡтарында интернет тиҙлеге заманса талаптарға яуап бирмәй.
Проект республиканың барлыҡ мәктәптәренә лә секундына йөҙ мегабитлы интернет үткәреүҙе күҙ уңында тота. Хөкүмәт президиумы ултырышында был уңайлыҡтарҙы башҡа йүнәлештә лә файҙаланыу мөмкинлеге ҡаралды. Белгестәр әйтеүенсә, оптик сүс кабелдәрен башҡа маҡсаттарҙа ла ҡулланырға була.
Интернет кабелдәрен төрлө маҡсаттарҙа ҡулланыу мәғариф учреждениеларына сығымдарҙы экономиялау мөмкинлеге лә бирәсәк. Программаға ярашлы, 1 сентябргә тиклем 1800 мәктәп юғары тиҙлекле селтәргә тоташтырылырға тейеш. Йыл аҙағына коммуникациялар менән барлыҡ белем усаҡтары ла тәьмин ителәсәк.
