Уға ярашлы, киләһе йылдың 1 ғинуарынан һәр кемгә урмандағы ҡороған ағасты йәки сыбыҡ-сабыҡты йыйырға рөхсәт бирелә.
Закон проектының авторҙашы булып Башҡортостандан Дәүләт Думаһы депутаты Зариф Байҡусҡаров сығыш яһаны. Уның билдәләүенсә, закондағы үҙгәрештәр тәү сиратта ауыл ерендә йәшәүселәр өсөн бик мөһим. Әлеге ваҡытта уларға район үҙәгенә барып рөхсәт документтарын алыу өсөн күп сығымдар сарыф итергә тура килә. Шул уҡ ваҡытта йығылып ятҡан ағасты рөхсәтһеҙ йыйыусыларға ҙур күләмдә штраф янаны. Яңы закон кешеләргә властарҙан рөхсәт ҡағыҙы юлламайынса кипкән ағастарҙы, ҡоро-һары ботаҡтарҙы хужалыҡта ҡулланыр өсөн алып ҡайтырға рөхсәт итәсәк.
