Өфө фонтандары рәсми рәүештә 1 майҙан эшләй башлай. Әлеге ваҡытта объекттарҙың техник торошон тикшереү, биҙәү-ремонтлау эштәре бара.
Һыуҙың көслө баҫымынан хатат, юшҡын ултырған тимер ҙә ялтырап китә. Өфөнөң иң гүзәл урынында урынлашҡан фонтан айырым иғтибар талап итә. Баш ҡала халҡы һәм ҡунаҡтарының яратҡан объектының матурлығын һаҡлар өсөн хеҙмәткәрҙәр бар көсөн һалырға тырыша. Рәфис Хөснийәров уның төҙөклөгө өсөн яуаплы.
Береһе фонтандың юшҡынын таҙалаһа, икенсеһе иллюминация фонарҙарын нығыта. Ул сафтан сыҡмаған, ҡышҡы һыуыҡҡа бирешмәгән.
Тотош донъя кимәлендә танылыу алған "Ете ҡыҙ" фонтаны ла тиҙҙән "бейергә" төшәсәк. Һоҡланғыс объектта шулай уҡ әҙерлек эштәре бара.
Өфөлә генә ике тиҫтәләп фонтан иҫәпләнә. Уларҙың һәр береһенә аҙна аҙағына тиклем тулы тикшереү үткәреү бурысы ҡуйылған. Ә инде унан һуң, йола буйынса фонтан миҙгеле 1 майҙан асыла.
