Янғын һағына - 100 йыл

Бер быуат элек Владимир Ленин "Ут менән көрәшеү буйынса дәүләт сараларын ойоштороу тураһында"ғы халыҡ комиссарҙары советы декретына ҡуй ҡуйған. Ошо көндән алып илдәге янғын һағының тарихы башлана.

Иҫке йола буйынса тармаҡ ветерандары йыл һайын апрелдә һөнәри байрамы билдәләй. Быйыл да улар юбилей уңайынан Өфөлә үткән тантаналы йыйылыштың төп ҡунаҡтары булды.

1990 йылдың авгусында Өфөнөң "Синтезспирт" заводында көслө янғын сыға. Ҡыҙыу ялҡын бер кемде лә эргәһенә ебәрмәй. Шуға ҡарамаҫтан ут менән көрәшеүселәр ғүмерҙәрен хәүеф аҫтына ҡуйып үҙҙәренә йөкмәтелгән бурысты намыҫ менән үтәй. Әммә зыян күреүселәр ҙә күп була. Химик мәтдәләрҙән 150-нән ашыу хеҙмәткәр ағыулана.

“Ул бүлексәлә 6-7 установка. Ә эргәлә таҙа фенол. Уның нимә икәнлеген халыҡ бер йыл алдан уҡ һиҙгән ине. Ошондай шарттарҙа беҙ уны еңеп сыҡтыҡ”.

Илдус Карамов, янғын һағы ветераны

Ул ваҡытта бөгөнгө кеүек ҡеүәтәле янғын һүндереү техникалары булмай. Әлеге ваҡытта хәүефһеҙлек һағында тороусылар заманса ҡорамалдар менән эш итә. Улар Салауат Юлаев һәйкәле янындағы майҙанда урын алды. Мәҫәлән, юғары ҡаттарҙа сыҡҡан янғынды һүндереүҙә ошо техника алмаштырғыһыҙ ярҙамсы. Уның 60 метрға тиклем бейеклеккә күтәрелеү мөмкинлеге бар.

“Баҫҡыстың лифты бар, 9-15 секундта өҫкә менеп етә. Тиҙ генә төшә лә ала”.

Рәмзил Ғиззәтуллин, Өфө ҡалаһы максимовка ауылының янғын һүндереү часы хеҙмәткәре

Тантаналы йыйылышта айырыуса ҡаҙанышҡа өлгәшеүсе хеҙмәткәрҙәр дәүләт һәм ведомство наградалары менән бүләкләнде. Шулай уҡ Герой-балалар ҙа тәбрикләнде. Шуларҙың береһе Ишембай районынан Ирек Үмәрбаев. Былтыр ул ут эсенән күршелә йәшәүсе ҡатынды ҡотҡарған.

“Мәктәптән ҡайтышлай төтөн күреп ҡалдым. Йүгереп барып ҡараһам, солан яна. Тиҙ генә атайыма барып әйттем, шунан кире йүгереп ишек астым, ул ваҡытҡа атайым да килеп еткән ине. Шунан инәйҙе ҡотҡарҙыҡ”.

Ирек Үмәрбаев, "Янғында батырлыҡ өсөн" миҙалы менән бүләкләнеүсе

Тағы ла бер наградаға Бәләбәйҙән 8 йәшлек Фәдис Сәлимгәрәев лайыҡ булды. Икенсе синыф уҡыусыһы быйыл ғинуарҙа мәкегә төшкән дуҫын ҡотҡарған. Күрһәткән батырлығы өсөн малай "Һыуҙа батып барыусыларҙы ҡотҡарған өсөн" миҙалы менән бүләкләнде.

“Улым менән ғорурланам. Батырлыҡ күрһәтеп иптәген ҡотҡарған. Әгәр ҡотҡармаһа, ни булырын уйлағы ла килмәй”.

Гөлназ Сәлимгәрәева, Фәдистең әсәһе

Осрашыуға Советтар Союзы геройы Ҡәйүм Әхмәтшиндың ҡыҙы ла саҡырылғайны. Уның атаһы ваҡытында Хәйбулла районында янғын инспекторы булып эшләгән. Уның тураһында төшөрөлгән фильм янғын һүндереүселәрҙең хәүефле, шул уҡ ваҡытта кәрәкле хеҙмәтенә тағы ла бер тапҡыр хөрмәт уятты.

Автор: Илдар Байбулатов.