Күрше республиканан килгән ҡунаҡтар иллеләп кеше, улар араһында мәҙәниәт, сәнғәт, һаулыҡ һаҡлау, мәғариф, төҙөлөш өлкәләрендә эшләүселәр бар. Татарстанда башҡорт милли-мәҙәни автономиялары өс ҡалала эшләп килә - Ҡазанда, Яр Саллыла һәм Түбәнге Камала.
Аҙнаҡай районында ла яңыраҡ "Ҡурай" йәмәғәт ойошмаһы" барлыҡҡа килгән. Татарстанда уңышлы эшләп килгән башҡорт фольклор ансамблдәре бөгөн кис Мәжит Ғафури исемендәге Башҡорт дәүләт драма театрында ҙур концерт программаһы менән сығыш яһай.
Бөгөн делегация вәкилдәре Башҡортостан Милли музейында ойошторолған ғилми-ғәмәли конференцияла ҡатнашты, фекер алышыу "Башҡорттар Татарстанда - тарих һәм заман" тигән темаға арналды. Улар араһында Бөйөк Ватан һуғышы ветераны Руф Зиннуров та булды. Ул үҙе әле Ҡазанда йәшәһә лә, тыуған яғы - Салауат районы Лаҡлы ауылы. "9 май алдынан республиканы күреп ҡайтыу - үҙе бер бәхет,"-ти уҙаман. Әйткәндәй, киләсәктә яҡташыбыҙ тыуған ауылында мәсет төҙөтөргә хыяллана. Проект документацияһы әҙер ҙә инде.
