"Хәтер вахтаһы" экспедицияһында төбәктән барлығы 125 кеше ҡатнаша. Уларҙың күбеһе - мәктәп уҡыусылары. Нуриман, Дыуан, Дәүләкән райондары һәм Өфө ҡалаһының эҙәрмәндәр отрядтары ағзалары Ленинград өлкәһенең Киров районында ике аҙна ҡаҙыныу эштәре башҡарасаҡ.
Төп маҡсат - Бөйөк Ватан һуғышында хәбәрһеҙ юғалған һалдаттарҙың ҡәберлектәрен табып, уларҙы тыуған яҡтарында хөрмәтләп ерләү.
Бөтә Рәсәй патриотик акцияһына туймазылар ҙа ҡушылды. Уҙған аҙнала 39 йәш эҙәрмән Волгоград өлкәһенә юлланғайны. Улар 112-се Башҡорт кавалер дивизияһының алыш урындары буйлап ҡаҙыныу эштәре алып барасаҡ. Әйткәндәй, йәштәр өсөн йыл дауамында ошондай мауыҡтырғыс экспедициялар уҙғарыу ҡаралған.
