Урал аръяғы агросәнәғәт колледжында буласаҡ абитуриенттар өсөн асыҡ ишектәр көнө үтте

Унда ҡала мәктәптәре уҡыусылары ҡатнашты. Һөнәри белем биреүҙән тыш, уҡыу йортонда студенттарҙың ижади һәләтен асыуға ла ҙур иғтибар бүленә. Күптән түгел колледждың “Ирәндек” фольклор ансамбле Өфөлә үткән республика “Халыҡ ынйылары” конкурсында өсөнсө урын яулаған.

Ғүмерлек күңелеңә ятҡан һөнәрҙе һайлау - һәр йәш кеше өсөн иң яуаплы мәл булһа, һөнәри белем биреү йорттарына иһә киләһе уҡыу йылына яңы абитуриенттар ҡабул итеү мөһим. Уҡыу йылы аҙағында үткәрелгән Асыҡ ишектәр көнө - иң ваҡытлы һәм кәрәкле сара, сөнки сығарылыш класы һәм эшсе һөнәрҙәр алырға теләгән йәштәр өсөн киләсәккә һөнәр һайлау бурысы тора. Урал аръяғы агросәнәғәт колледжындағы бындай сарала ла мәктәп уҡыусылары колледж һәм педагогтар менән танышты, оҫталыҡ дәрестәрен ҡараны.

“Бөгөн бында ҡала мәктәптәренән, интернаттан килделәр. Төп маҡсатыбыҙ – колледж менән таныштырыу. Уҡыусылар бында килеп, барыһын күреп, тотоп ҡарап, мастер-класстарҙа ҡатнашып киләсәк һөнәрҙәрен һайларҙар”.

Илнур Мырҙагилдин, Урал аръяғы агросәнәғәт колледжы директоры

Асыҡ ишектәр көнөндә иретеп-йәбештереүсе, тегенсе, автомеханик, баҡсасы, бухгалтер иҫәбен алып барыусы һәм башҡа кәрәкле һөнәрҙәрҙең нескәлектәренә иғтибар йүнәлтелде. Ошо өлкәләр бөгөнгө йәштәр араһында ихтыяж менән файҙаланыла.

“Беҙҙе бында матур итеп ҡаршы алдылар, оҫтаханала булдыҡ. Барыһын да матур итеп һөйләнеләр. Уҡыусыларға барыһы ла оҡшаны. Уҡырға килеү теләген белдерҙеләр”.

Гөлшат Йәрмөхәмәтова, Баймаҡ лицей-интернаты тәрбиәсеһе

Колледж йыл һайын яңы уҡыу йылына 225 студент ҡабул итә. Бында шулай уҡ уҡыусылар үҙҙәренең төрлө өлкәләге һәләттәрен дә үҫтереү мөмкинлегенә эйә. Мәҫәлән, “Ирәндек” фольклор ансамблендә шөғөлләнеүселәр яңыраҡ республика “Халыҡ ынйылары” конкурсында “Аулаҡ өй” тамашаһы менән өсөнсө урын яулап ҡайтты.

“Студенттар тәүлек әйләменә ятаҡта йәшәгәс, беҙ уларҙы төрлө яҡлап тәрбиәләргә тырышабыҙ. Бейеү түңәрәге, фольклор ансамбле бар, төрлө спорт секциялары ла эшләй”.

Нәзирә Килдейәрова, Урал аръяғы агросәнәғәт директорының уҡытыу-тәрбиә эштәре буйынса урынбаҫары

Урал аръяғы агросәнәғәт колледжында бына шулай белем менән бер рәттән бер нисә һөнәр ҙә алып сығырға, һәләттәреңде лә үҫтерергә мөмкин.

Автор: Айгөл Иҙелбаева.