Ишембай машиналар төҙөү заводының банкротлыкҡа тарыуынан 400-ҙән ашыу хеҙмәткәрҙәр эшһеҙ тороп ҡала. Бынан тыш, предприятие етәкселеге биргән вәғәҙәләргә ышанып айҙар буйы эшләүселәр ҙә була. Бурыс ике йөҙ миллион һумдан ашҡан. Һәр ҡайһыһы түләнмәгән иҫәп, кредиттар менән йәшәй. Һуңғы өмөттән һәм ғәҙеллек талап итеүҙән ишембайҙар Рөстәм Хәмитов менән тура бәйләнешкә сыҡты.
Завод эшселәре ҡабат эшкә барыр ине тик йоҙаҡ ҡына үткәрмәй. Инде өсөнсө йыл. Һәр береһенең хеҙмәт стажы ун йылдан да кәм түгел. Гөлсирә Фәйзуллина ғына мәҫәлән, 30 йылдан ашыу ғүмерен Ишембай машиналар төҙөү заводына арнаған. Ошо көнгә тиклем предприятие ниндәй генә ауырлыҡтар аша үтмәһен, хеҙмәт хаҡын түләүҙә тотҡарлыҡ булғаны юҡ, тип хәтерләй ханым.
Хеҙмәт хаҡын ала алмаған хеҙмәткәрҙәр һаны берәү-икәү генә түгел, ә 500-ләп самаһы. Йыл буйы эшләгән аҡсаһын ала алмай баҡыйлыҡҡа күскәндәр ҙә бар.
Ишембай машиналар төҙөү заводы эшкәмәрлеге туҡталыуға өс йыл тирәһе ваҡыт үткән. Эшселәр хеҙмәт хаҡын түләүҙе талап итеп ниндәй генә тупһаларҙы тапамаһын, күпме генә предприятиеға килеп урамаһын, әлегеләй ишек бикле булған кеүек мөрәжәғәттәр ҙә асыҡ ҡала.
Әйткәндәй, Ишембай машиналар төҙөү заводынан 200 метр алыҫлыҡта заманында гөрләп торған тағы бер завод булған. Ул да бер ҡулдан икенсеһенә күсеп, тора-бара банкротлыҡҡа төшә. Һөҙөмтәлә хеҙмәткәрҙәр эшһеҙ, ете айлыҡ хеҙмәт хаҡын ала алмай тороп ҡала.
Бер быуатлыҡ тарихы булған, Бөйөк Ватан һуғышы йылдарында ҡорал етештергән, илдә иң яҡшыһы һаналған предприятие бөгөн бөлгөнлөк хәлендә. Ишембай заводының элекке етәксеһе вазифаһын башҡарыусы Рәшит Таһиров әйтеүенсә, предприятиеның бөгөнгө хәле милек хужаһына барып тоташа. Иван Лиҙың миллиард һумлыҡ кредит алып, Ишембай менән бергә Ҡонғор машиналар эшләү заводын да залогҡа һала. Иҫәпләшә алмағас, Рәсәйҙең ике ҙур предприятиеһының эше туҡтатыла.
Өмөтһөҙ шайтан ғына. Күп булмаһа ай тирәһе ваҡыт үтер тип ышандырҙы завод етәкселеге. Әле һөйләшеүҙәр алып барыла. Яҡын киләсәктә объекттың ҡабаттан йәнләнеүе көтөлә. Буяуы уңып "Уңышлы хеҙмәт көнө" тигән банерҙағы яҙыуҙың да яңы төҫ алырына өмөт бар.
