Татарстан башҡорттары Өфөлә

Башҡортостанда Татарстан башҡорттары мәҙәниәт көндәре бара. Бөгөн күрше республикала йәшәүсе милләттәштәребеҙ "Татарстан башҡорттары - тарих һәм заман" темаһына арналған ғилми-ғәмәли конференцияла ҡатнашты. Милли батырыбыҙ Салауат Юлаев һөйкәленә сәскә гөлләмәләре һалды. Шулай уҡ делегация вәкилдәре Мәжит Ғафури исемендәге Башҡорт дәүләт драма театрында ҙур концерт программаһын да ойошторҙо.

Татарстан башҡорттарын Илеш районында хөрмәтләп ҡаршы алдылар. Ҡурай моңдары, дәртле бейеүҙәр - төбәктең үҙешмәкәр коллективтары үҙҙәренең сығыштары менән күрше республикала йәшәүсе милләттәштәргә рух күтәренкелеге өҫтәне. Ҡазанда, Яр Саллыла һәм Түбәнге Камала уңышлы эшләп килгән башҡорт милли-мәҙәни автономиялары вәкилдәре артабан Өфөгә юл тотто. Башҡортостандың Милли музейында ойошторолған ғилми-ғәмәли конференцияла сығыш яһанылар. Фекер алышыу "Башҡорттар Татарстанда - тарих һәм заман" тигән темаға арналды. Әйткәндәй, ут күршеләребеҙ үҙ сығышында ҡыуаныслы яңылыҡ ишеттерҙе - Аҙнаҡай районында "Ҡурай" йәмәғәт ойошмаһы барлыҡҡа килгән. Башҡортостандың Мәҙәниәт министрлығы урындағы башланғысты ҡеүәтләп сығыш яһаны.

“Көҙгөһөн беҙ Татарстанға барып “Ҡурай” ойошмаһына мастер-класс, семинарҙар ойошторасаҡбыҙ”

Рәнис Алтынбаев, Башҡортостандың мәҙәниәт министры урынбаҫары

Башҡортостанға килгән милләттәштәребеҙ араһында мәҙәниәт, мәғариф, һаулыҡ һаҡлау өлкәләрендә эшләүселәр бар. Саба районынан Рәхимә Вәлиуллина ун икенсе йыл башҡорт телендә "Ирәндек" радиотапшырыуын алып бара. Ул Татарстан халҡын аҙнаһына бер тапҡыр башҡорттарҙың ғөрөф-ғәҙәттәре, йолалары менән таныштыра.

“Беҙҙе ете район тыңлай. Башҡорт тапшырыуҙарын бик ныҡ яраталар. Сөнки башҡорт теле йыр-моң кеүек, тиҙәр. Күберәк һөйләүҙе һорайҙар”.

Рәхимә Вәлиуллина "Ирәндек" тапшырыуы алып барыусыһы

Ут күршеләребеҙ Өфө тамашасыһын ҙур концерт программаһы менән дә ҡыуандырҙы. Яр Саллынан "Гөлнәзирә" халыҡ фольклор ансамбле "Килен төшөрөү" йолаһын күрһәтте. Әйткәндәй, былтыр коллектив сирек быуат эшмәкәрлегенә йомғаҡ яһаған.

“Концерттарыбыҙҙы башҡорт телендә үткәрәбеҙ. Ҡурай, ҡумыҙ, бейеү, йырҙар менән сығыш яһайбыҙ”

Рәмилә Йосопова, "Гөлнәзирә" халыҡ фольклор ансамбле етәксеһе

Татарстанда йәшәүсе милләттәштәребеҙ әүҙем йәмәғәт эшмәкәрлеге алып барғандары өсөн Башҡортостандың мәҙәниәт министрлығы һәм Бөтә донъя башҡорттары ҡоролтайының Рәхмәт хаттары менән бүләкләнде. "Ике республика араһында дуҫлыҡ мәңгелек,"- тине улар үҙ сығышында. Аралар ҙа быға ҡаршылыҡ түгел.

Бында саҡырылыуыбыҙға бик шатбыҙ. Барыһына ла ҙур рәхмәт”.

Әлфиә Ғилфанова, "Сал Урал" ансамбле солисы

Бындай мәҙәни осрашыуҙар Башҡортостанда йыл да ойошторолоп тора. Күләмле проектта Силәбе, Һамар, Ырымбур, Свердловск өлкәләрендә йәшәүсе милләттәштәребеҙ ҙә ҡатнашып өлгөргән. Иң мөһиме тап ошондай саралар төбәктәр араһындағы бәйләнештәрҙе нығыта, берҙәмлеккә әйҙәй.

Автор: Гөлназ Хәйбуллина.