Экология мәсьәләһе бөгөн республика башлығының Рәсәй йәмәғәт палатаһы сектретары Валерий Фадеев менән осрашыуында күтәрелде. Яҡтар шулай уҡ инвестициялар йәлеп итеү, төрлө формалағы бизнестың хеҙмәттәшлеге, агросәнәғәт комплексын нығытыу, төбәктә туризмды үҫтереүгә арналған һорауҙар буйынса ла фекер алышты.
Рөстәм Хәмитов республикала ғәмәлгә ашырылған күләмле инвестиция проекттары менән таныштырҙы, шулай уҡ илдең башҡа субъектары менән ҡаты көнкүреш ҡалдыҡтарын һаҡлау, айырыу һәм эшкәртеү өлкәһендә тәжрибә менән уртаҡлашырға әҙер булыуын белдерҙе.
Осрашыу барышында күҙәтеүселәр темаһы ла күтәрелде. 18 мартта республикала уларҙың һаны 10 меңгә барып еткән, йәғни һәр бер һайлау участкаһына өсөшәр күҙәтеүсе тура килгән. Илдең йәмәғәт палатаһы секретары фекеренсә, Башҡортостан был йәһәттән һоҡландырғыс күрһәткескә өлгәшкән. Шуға ла Федерация Советы һәм Дәүләт Думаһы республика тәжрибәһен башҡа һайлау кампанияларында таратырға ҡарар иткән.
