Дауахана бурысын табиптар үҙ кеҫәһенән ҡаплай. Ишембай үҙәк район дауаханаһы хеҙмәткәрҙәре сараһыҙлыҡтан беҙҙең редакцияға мөрәжәғәт итте. Аҡ халатлылар әйтеүенсә, был көнгә уларҙы элекке баш табиптары ҡалдырған. Ул эшләгән осорҙа ла хәл шулай уҡ маҡтанырлыҡ булмаған.
Баш табип урынына баштан ашҡан бурыс ҡына ҡалған. Ишембай үҙәк район дауаханаһына килеп инеү менән беҙҙең ижади төркөмдө тиҫтәләп медицина хеҙмәткәре ҡаршы алды. Уларҙы борсоған һорауҙар күп. Яуап биреүсеһе генә юҡ.
Дауаханала дарыуҙар һәм медицина ҡорамалдары етешмәй. Өҫтәүенә, белгестәр ҙә юҡ. Сөнки ваҡытында элекке баш табип тиҫтәләп хеҙмәткәрҙе эшенән бушатҡан. Улар араһында хирург, анестезиолог, кардиолог, лор табиптары ла бар. Хәҙер райондың 90 меңгә яҡын кешеһен хеҙмәтләндереү өсөн белгестәргә көн дә тиерлек эшкә сығырға тура килә. Ә өҫтәмә түләүҙәр тураһында һүҙ ҙә юҡ. Хатта, медицина халаттарын да үҙҙәренә һатып алырға тура килә.
Ошо көнгә ҡалдырған баш табип үҙе лә эшенән бушатылған. Ә бурыстар хеҙмәткәрҙәр елкәһендә ҡалған. Ә яңы етәкселек был проблемаларҙы йәнәһе лә тәүгә беҙҙән ишетеүгә һылтанды.
Ун минут дауамында Ишембай үҙәк район дауаханаһы баш табибы вазифаһын башҡарыусы һәм бухгалтер медицина персоналының ялыуын ҡарап сыҡты.
Дауахананың 17 миллион һумлыҡ бурысы ҡайҙан килеп сығыуын бухгалтерға аңлатырға тура килде. Сөнки баш иҡтисадсы камераны күреү менән аңлатма биреүҙән баш тартып, ҡасыу яғын ҡараны.
Ишембай үҙәк район дауахаһы килеп тыуған проблема менән хәбәрҙар. Ул медицина хеҙмәткәрҙәренең киләһе дөйөм йыйылышында хәл ителәсәк. Әлеге мөрәжәғәттә әйтелгән бар һүҙҙәр ҙә шулай эҙмә-эҙлекле ҡараласаҡ.
Әммә мәсьәләне был ғына хәл итмәй. Беҙҙең сәфәрҙән һуң ялыу яҙып ҡултамға ҡуйыусыларҙы эшенән бушатыу менән янау башланған. Хеҙмәткәрҙәр артабан прокуратураға мөрәжәғәт итергә йыйына.
