Бөгөн тәүге эшелон Санкт-Петербургҡа юлланды. Быйыл яҙғы саҡырылышта республиканан 5 меңдән ашыу һалдат Ватан һағына баҫыр, тип көтөлә.
Уларҙың 1500-е Көнсығыш, 1200 егет Үҙәк, 900-гә яҡыны Көнбайыш округка оҙатыласаҡ. Бынан тыш, 200-ҙән ашыу һалдат Көньяҡ округҡа, тағы ла 100 кеше Төньяҡ флотҡа алынасаҡ. Бөгөн хәрби частәргә юлланыусыларҙы ата-әсәләре, яҡындары оҙатып, алдағы бер йылды һөҙөмтәле һәм файҙалы итеп үткәреүҙәрен теләне.
Бөгөн шулай уҡ егеттәр араһында хәрби комиссариат спорт ярыштары ла уҙғарҙы. Буласаҡ һалдаттар әрме хеҙмәте нормативтарын тапшырҙы. Бәйге еңеүселәренә ил алдындағы бурысын үҙҙәре теләгән ғәскәрҙә үтеү мөмкинлеге бирелә. Был хоҡуҡ менән файҙаланыу өсөн хәрби хеҙмәткә саҡырылыусы егеттәр дүрт этаптан торған һынауҙы ситтән тороп үтергә тейеш була. Яҙғы саҡырылыш кампанияһы 15 июлгә тиклем дауам итә.
