Өфөлә опера йондоҙо Илдар Абдразаҡовтың 1-се Халыҡ-ара музыка фестивале дауам итә. Бөгөн Башҡортостандың халыҡ артисы "Мәрхәмәт" фонды менән берлектә сираттағы хәйриә концертын ойошторҙо. Билет һатыуҙан килгән барлыҡ килем баш ҡалала уңышлы эшләп килгән Балалар үҫеш үҙәгенә йүнәлтеләсәк. Унда мөмкинлектәре сикләнгән кескәйҙәр шөғөлләнә.
Өфөләге Балалар үҫеш үҙәгендә шөғөлләнеүсе малай-ҡыҙҙар бөгөн тулҡынландырғыс мәлдәр кисерҙе. Сәнғәт донъяһына ғашиҡ кескәй йөрәктәр опера йондоҙо Илдар Абдразаҡов алдында сығыш яһаны. Башҡортостандың халыҡ артисы "Мәрхәмәт" фонды менән берлектә ойошторолған хәйриә концерты алдынан йәш таланттарҙың йыр-бейеү программаһын ҡараны. Мөмкинлектәре сикләнгән балалар өсөн был майҙан - киләсәккә өмөт һәм ышаныс сатҡыһы ла. Бәләкәй сәхнәнән старт алған малай-ҡыҙҙар Халыҡ-ара кимәлдәге конкурстарҙа ла еңеүҙәр яулай.
Илдар Абдразаҡовтың яңы идеялары ла барлыҡҡа килгән. Киләсәктә ул Балалар үҫеш үҙәгендә шөғөлләнеүселәрҙе үҙе менән бергә ҙур сәхнәгә сығарырға ниәтләй. Әйткәндәй, бында ойошторолған дәрестәргә өс йөҙгә яҡын мөмкинлеге сикләнгән малай-ҡыҙ йөрөй. Ата-әсәләр билдәләүенсә, үҙәктәге профессиональ педагогтар, логопед, психолог, дефектолог һәм терапевтар балаларҙың сәләмәтлеген яҡшыртыуға күп көс һала.
Донъяның иң яҡшы басы Илдар Абдразаҡов балалар менән осрашыуҙан һуң "Мәрхәмәт" хәйриә фонды менән берлектә хәйриә концертын ойошторҙо. Тәүгеләрҙән булып сәхнәгә Башҡортостандың билдәле опера йырсылары сыҡты. Милли симфоник оркестр, классик музыка, тере тауыш һәм изгелек атмосфераһы. Тамашасылар һәр бер сығышты тулҡынланып күҙәтте.
Илдар Абдразаҡовтың Беренсе Халыҡ-ара музыка фестивале сиктәрендә ойошторолған хәйриә концертын ҡарарға бөгөн меңгә яҡын кеше килде. Мәрхәмәтлеккә, изгелеккә ынтылыусылар ярҙамында барлығы өс миллион һумға яҡын аҡса йыйыла. Ул Өфөләге Балалар үҫеш үҙәгендә шөғөлләнгән малай-ҡыҙҙарҙың реабилитацияһына йүнәлтеләсәк.
