Башҡорт телендә һөйләшәм, башҡорт телендә яҙам

Ошондай девиз аҫтында Башҡорт дәүләт университетында региональ диктант үтте. Телде пропагандалау, грамоталылыҡты үҫтереү маҡсатында республикала быйыл ул дүртенсегә ойошторолдо.

Башҡорт теленән региональ диктант яҙыусыларҙы Башҡорт дәүләт университеты ансамбле дәртле йыр-моңдары менән ҡаршы алды. Араларында бейеүгә төшөүселәр ҙә табылды. Яҙма эшкә килеүселәр күп булғанға күрә, ул уҡыу йортоноң ике ҙур аудиторияһында үтте.

“Йыл һайын ҡатнашыусылар иҫәбе арта бара. 2015 йылда 3505 кеше ҡатнашһа, 2016 йылда ҡатнашыусылар һаны 3929 булды, ә инде 2017 йылда диктантты 7741 кеше яҙҙы”.

Гөлфирә Абдуллина, Башҡорт дәүләт университетының шәрҡиәт һәм башҡорт тел ғилеме кафедраһы мөдире

Диктант өсөн текст быйыл Салауат Юлаев ордены кавалеры Мәрйәм Бураҡаеваның ижадынан алынды. Ете бүлектән торған "Арғымаҡ" китабының "Моң" өлөшөнән өҙөк һайлаған.

“Бик шатмын. “Арғымаҡ” китабы өс тапҡыр нәшер ителде, кеше араһында тиҙ тарала. Тимәк был уларға кәрәк. Текст “Моң” өлөшөнән алынған, был төп өлөштәрҙең береһе. Сөнки кешелек донъяһының күңел берлеген, туғанлыҡты, үҙ-ара мөнәсәбәтте моң, өн тоташтыра”.

Мәрйәм Бураҡаева, Салауат Юлаев ордены кавалеры

Яҙма эште Башҡортостандың халыҡ артисы Олег Ханов үҙе уҡыны. Диктант яҙыусыларҙы ул уҡыу аудиторияһынан театрға алып киткәндәй тойолдо. Башҡорт теленең нескәлеген, моңло яңғырашын асып һалды. Яҙма эштә ниндәй генә һөнәр вәкилдәре булманы: фән эшмәкәрҙәре, журналистар, күренекле сәхнә йондоҙҙары ла бар. Араларында хатта, күрше төбәктәрҙән сараға махсус килеүселәр ҙә табылды.

Башҡорт дәүләт университеты һәм уның филиалдарынан тыш, яҙма эштә Рәсәй төбәктәре һәм сит илдә йәшәүселәр ҙә ҡатнашты. Быйыл тәүге тапҡыр башҡорт теле менән ҡыҙыҡһыныусы төрөк студенттары ла ҡушылды. Әйткәндәй, шулай уҡ уҡыу йортоноң рәсми сайты аша ла яҙыу мөмкинлеге бирелде. Күгәрсен районында мәҫәлән, сара бер-нисә ауыл мәктәбендә үтте. 255 һүҙҙән торған диктантты улар тиҙ арала тамамланы. Әйтергә кәрәк, тиҫтәләгән йылдар дауамында парта артына ултырып та ҡарамаған кешеләр өсөн был көн айырыуса иҫтәлекле булды. Улар үҙҙәренең йәшлек йылдарын, бала-сағын иҫкә төшөрҙө.

Ә инде һөҙөмтәләр 28 апрелдә иғлан ителәсәк. Улар менән рәсми сайт аша танышырға мөмкин буласаҡ. Адресты һеҙ экранда күрәһегеҙ.

Автор: Азат Ғәлиуллин.