Мифтахетдин Аҡмулла исемендәге Башҡорт дәүләт педагогия университетында һаулыҡ мөмкинлектәре сикләнгән балалар тәрбиәләүсе ата-әсәләр өсөн түңәрәк өҫтәл артында һөйләшеү уҙғарылды.
Мөмкинлеге сикләнгән баланың донъяға килеүе-ата-әсәләр өсөн күп һорауҙар тыуҙыра. Баланы нисек тәрбиәләргә, йәмғиәткә нисек яраҡлашып йәшәргә өйрәтеү кеүегерәк һорауҙар борсой. Һәм шул да күҙәтелә: һаулыҡ мөмкинлектәре сикләнгән бала тыуғандан һуң, ата-әсәләр артабан бала тапмаҫҡа тырыша. Әммә түңәрәк өҫтәлдә ҡатнашыусы Гөлназ менән Ринат Мәхмүтовтар был иҫәпкә инмәй.
Һаулыҡ мөмкинлектәре сикләнгән бала тыуған хәлдә, артабанғы нәҫелдә ауырыуҙар булмаһын өсөн генетик тикшеренеүҙәр үтергә кәрәк. Ойоштороусыларҙың сығышында ошоноң кеүек күп файҙалы кәңәштәр һәм тәҡдимдәр яңғыраны.
"Әсә йөрәге" төбәк йәмәғәт ойошмаһы рәйесе Гөлшат Ибраһимова ошо сараны ойоштороусыларҙың береһе.Тормош ҡуйған һынауҙарҙы бергәләп еңеп сығасаҡбыҙ, тип ышана ул.
Бөгөнгө осрашыуҙа ата-әсәләр табиптар, генетиктар, депутаттар менән ғаиләлә тыуған көнүҙәк һорауҙарҙы уртаға һалып һөйләште. Киләсәктә бындай түңәрәк өҫтәлдәрҙе район һәм ауылдарҙа ла ойоштороу күҙаллана.
