Был яңылыҡ республикала йәшәүсе 33 мең кешегә ҡағыла. Минималь хеҙмәт хаҡын һәм йәшәү минимумын тигеҙләү мәсьәләләре Рөстәм Хәмитовтың профсоюздар менән осрашыуында ла күтәрелде.
Унда билдәләнеүенсә, дәүләт һәм муниципаль учреждениеларҙа эшләүселәрҙең эш хаҡы 4 процентҡа күтәрелә. Ошо маҡсатта федераль ҡаҙнанан 8 миллиард һумдан ашыу аҡса бүленгән. Өҫтәмә финанстар аҙ тәьмин ителгән ғаиләләргә пособиеларға һәм ташламаларға йүнәлтелә.
Республика Башлығы хеҙмәт хаҡын тотҡарлау проблемаһын да күтәрҙе. Иң ҙур бурыстарҙың береһе Өфө фанера комбинатында йыйылған. Меңгә яҡын кеше ярты йыл тиерлек эш хаҡы ала алмай аҙапланды. Енәйәт эше ҡуҙғатылғандан һуң предприятие етәксеһе ҡулға алынды. Рөстәм Хәмитов профсоюздарға бындай хәлдәргә юл ҡуймаҫҡа һәм ябай эшсе мәнфәғәттәренән сығып эш итергә саҡырҙы.
