"Тере Еңеү. Һуғыш тарихы йөҙҙәрҙә". Өфө Бөтә Рәсәй проектына ҡушылды. Бөгөн тәүге ҡатнашыусылар 40-сы йыл ваҡиғаларын тергеҙҙе. Фото төшөү майҙаны итеп Башҡортостандың Милли музейы менән Өфө моторҙар эшләү берекмәһе һайланды.
Морат Ҡолмөхәмәтов билдәле башҡорт яҙыусыһы Яҡуп Ҡолмойҙың ейәне. Ул бөгөн олатаһының уҙған быуатта төшкән фотоһын яңыртасаҡ. Хәрби кейем әҙер. Стилистар геройҙы 40-сы йылдарға тура килтереп биҙәндерҙе.
Әйткәндәй, ҡылыс Башҡортостандың Милли музейынан фотопроект өсөн махсус алынған. Ул учреждениела ҡәҙерләп һаҡланған экспонаттарҙың береһе.
"Тере Еңеү" тип исемләнгән Бөтә Рәсәй акцияһы туғыҙ ҡала араһында, шул иҫәптән Өфөлә үтә. Проектҡа ҡушылыусылар ғаилә альбомынан Бөйөк Ватан һуғышы йылдарынан һаҡланған һәм яугирҙың вариҫтарының хәҙерге фотоһүрәттәрен һайлап ебәрҙе.
Башҡортостандың Милли музейында ғына түгел, фото төшөү майҙаны булараҡ Өфө моторҙар эшләү берекмәһе предприятиеһы ла һайланды. Рыбинск ҡалаһынан эвакуацияланған заводтың да тарихи фотолары етерлек. Ә йәкшәмбе проекттың йәнә бер күләмле өлөшө көтөлә.
