Мифтахетдин Аҡмулла исемендәге әҙәби берекмәнең ойошторолоуына 55 һәм Башҡортостандың 100 йыллығына арналған сарала республиканан барған яҙыусылар, шағирҙар ҙа ҡатнашты.
Өлкә әҙиптәре менән Башҡортостан ҡунаҡтары түңәрәк өҫтәл артында фекер алышты. Һөйләшеүҙә китаптар баҫтырыу, милли матбуғаттың яҙмышы кеүек мөһим һорауҙар күтәрелде. Ил, милләт, тел һәм башҡорт мәҙәниәтенә ҡағылышлы темалар ҙа ситтә ҡалманы.
Аҡмулла әҙәби берекмәһе ярты быуаттан ашыу инде урындағы милли шиғриәтте, прозаны үҫтереүҙә ҙур эш башҡара. Ойошма тарафынан өлкәлә төрлө саралар уҙғарыла, йәш таланттар асыла. Шулай уҡ әҙиптәр йәш ижадсылар менән дә әүҙем эшләй. Шиғриәт конкурстары уҙғарыла, башҡорт теле уҡытыусыларының семинарҙары үтә.
Ғәлимов Сәләм исемендәге премия биш йылға бер тапҡыр иң яҡшы тип танылған ҡәләм тибрәтеүселәргә, журналистарға һәм тыуған яҡ тарихын өйрәнеүселәргә тапшырыла. Премияға ҡушып, аҡсалата дәртләндереү ҙә ҡаралған. Быйыл әҙиптәр Кәтибә Кинйәбулатова исемендәге премия булдырыу тураһында ла ҡарар ҡабул итте.
