Бөгөн илдә янғын һағы көнө билдәләнә

Әлеге ваҡытта янғын һағы хеҙмәте Ғәҙәттән тыш хәлдәр министрлығы составына инә. Һәр ҡала һәм район үҙәктәрендә даими әҙерлек шарттарында эшләүсе ҡеүәтле подразделениелар бар. Шәхси состав юғары һөнәри кимәлгә һәм яҡшы физик әҙерлеккә эйә, махсус һаҡ саралары һәм кәрәкле ҡорамалдар менән тәьмин ителгән.

Бөгөн илдең янғын һағы хеҙмәте 470 меңгә яҡын кешене берләштерә. Был һөнәр эйәләрен башҡаларҙан батырлыҡ һәм ҡыйыулыҡ, һәр ваҡыт ярҙамға килергә әҙер булыу кеүек сифаттар айырып тора. Шулай уҡ бөгөн янғын хеҙмәте өсөн икеләтә байрам һанала. Теүәл 45 йыл элек илдә көрсөк хәленә идара итеү үҙәгенең структура бүлексәһе ойошторолған. Уның маҡсаты - янғын һағы һәм авария-ҡотҡарыу берләшмәләренең барлыҡ төр хәрби әҙерлеген контролдә тотоу.

“Янғын һүндереү хеҙмәтендә эшләүемә теүәл 18 йыл. Һәр янғын башҡаһынан айырыла, һәр береһенә айырым алымдар ҡулланырға кәрәк. Беҙгә янғын тураһында хәбәр килгәс тә, беҙ шундуҡ фажиғә урынына юлланабыҙ. Норматив буйынса, йыйыныу ваҡыты бер минуттан артырға тейеш түгел”.

Ришат Иҡсанов, Өфөнөң 22-cе янғын һүндереү отряды хеҙмәткәре

Автор: Илдар Байбулатов.