Үткән йылдың авгусында башланған төҙөлөштө Йыл төҙөлөшө тиергә лә мөмкин. Учалы районы Аҙнаш ауылында бер-нисә ғаилә берләшеп, Уй йылғаһы аша күпер күтәрә башлай. Улар был ҙур һәм яуаплы эшкә сараһыҙҙан тотонған. Ауылға ашығыс ярҙам, ҡотҡарыу хеҙмәттәре урау юл аша йөрөй. Эште башлаусыға экологик хеҙмәттәр штраф һалған.
Уй йылғаһы буйында ҡасандыр Аҙнаш ауылы гөрләп торған. Йылдар үтеү менән эшһеҙлектән йәштәр ситкә киткән. Себер тарафтарында эшләп хаҡлы ялға сыҡҡан бер-нисә ғаилә тыуған ауылдарына ҡайтып төпләнә. Ауыл советы тыуған төйәктәрендә яңы тормош башлаусыларға электр уты үткәрергә, эсәр һыулы булыуҙа ярҙам итә. Тик һуңғыһы- Уй йылғаһы аша күпер һалдырыу мәсьәләһе генә тиҫтә йыл дауамында хәл ителмәй ҡала бирә. Шуға ла күрше-тирә берләшеп хәләл көстәренә күпер төҙөлөшөн башлай.
Төҙөлөш башлағанда ауылдаштарҙың бөтәһе лә: " Аҙнашта күпер кәрәк тигән тәҡдимгә ҡушҡуллап риза була һәм ҡултамғалар ҡуя. Тора-бара ут күршеләре ризаһыҙлыҡ белдереп, күпер бөтөнләй кәрәкмәй, тип, төрлө инстанцияларға яҙа. Һөҙөмтәлә, урындағы халыҡ тәҡдиме менән башланған төҙөлөштө туҡтатыу мәсьәләһе судҡа тиклем барып етә.
Учалы районы Аҙнаш ауылы халҡы оҙаҡ йылдар дауамында юлһыҙ һәм күперһеҙ интеккән. Тыуған ауылына ҡайтып төпләнеүсе Ғилметдин Ҡунаҡбаев үҙ ҡулдары менән Уй йылғаһы аша күпер төҙөргә ҡарар итә. Күпер ныҡлы терәүҙәрҙә тора, арҡыры торбалар нығытылған, ҡалын таҡталар килтерелгән. Әммә төҙөлөштө аҙағынса еткерергә тура килмәй. экологияны боҙған тип, Ҡунаҡбаевҡа штраф һалынған.
Ауылда ни бары алты ғына йорт. Күпер төҙөлөшөн аҙағына тиклем еткереү бик мөһим. Төҙөлөшкә хәләл көсөн түккән, бар оҫталығын һалған Ғилметдин Ҡунаҡбаев сигенергә теләмәй. Уҙаман экологтарҙың ерҙе аҡтарып, юлды иҙеүсе урмансыларҙың эшмәкәрлегенә күҙ йомоуҙарына ризаһыҙлыҡ белдерә.
Экологтарҙың дәғүәһе буйынса ҡосаҡ -ҡосаҡ ҡағыҙ эшкә ебәрелгән. Улар өсөн ауылдаштарын күперле итергә ынтылған Ғилметдин Ҡунаҡбаев яуап тотасаҡ.
Учалы районы хакимиәте етәкселеге Аҙнаш ауылында күпер төҙөлөшө хаҡында хәбәрҙар. Улар халыҡ иҫәбенә эшләнгән күпер төҙөлөшөнә түбәндәгесә аңлатма бирҙе.
Алдында ниндәй генә ҡаршылыҡтар һәм кәртәләр осрамаһын, күпер төҙөлөшөн башлаған Ғилметдин Ҡунаҡбаев сигенергә йыйынмай. Әммә Фемида яҡлылар бизмәндәре кем яғына тартыр. Уныһын сираттағы суд ултырышы хәл итәсәк.
