Башҡортостанда медицинаны модернизацииялауға быға тиклем булмаған күләмдә аҡса бүленәсәк. Дауаханаларҙы, фельдшер-акушер пункттарын ремонтлау, яңыларын төҙөүҙе иҫәптә тотҡан программа бөгөн Хөкүмәт президиумы ултырышында ҡаралды.
Тәү сиратта балалар дауаханалары, бала табыу бүлектәрен төҙөкләндереү күҙаллана. Эштәр әле үк башланған да инде. Медицина өлкәһен яңыртыу барышы менән беҙҙең хәбәрселәр ҙә ҡыҙыҡһынды.
Яңы бала табыу бүлегендә яңы кеше. Инна Сәлихова төҙөкләндерелгән бала ҡарау бүлмәһенең тәүге пациенты. Элеккеһен күреп өлгөрмәнем, әммә дауахананың хәҙерге хәле оҡшай, уңайлыҡтар ҡул аҫтында, биҙәлеш тә кәйефте күтәрә, ти ул.
Яңы тыуған сабыйҙар өсөн уңайлыҡтар тыуҙырылһа ла, әсәләргә бер аҙ түҙергә тура килә. Әле Өфөнөң 17-се балалар дауаханаһының икенсе өлөшөндә ремонт бара. Палаталар, табип , дауалау бүлмәләре тулыһынса яңыртыла. Һыу, йылы үткәргестәр ҙә алмаштырыла.
Сиратта ҡыйыҡты алмаштырыу, бинаның тыш яғын яңыртыу. Эштәрҙе 1 ноябргә тиклем тамамлау бурысы тора.
Быйыл ғына өс дауахананы төҙөкләндереүгә биш йөҙ миллион һумға яҡын аҡса бүлеү ҡарала. Тәү сиратта балалар медицинаһы камиллаштырыласаҡ. Был эштәр Владимир Путин иғлан иткән бала саҡ ун йыллығы сиктәрендә башҡарыла. Ә бына республиканың медицина өлкәһен камиллаштырыуға бүлгән аҡсалары байтаҡҡа күберәк. Һаулыҡ һаҡлау министры әйтеүенсә, медицинаға бындай күләмдәге сығымдар күптән бүленгәне юҡ ине.
Ә бына ташламалы дарыуҙар менән хәл киҫкен ҡала. Федераль үҙәктән бушлай медицина препараттары алыу өсөн аҡса бик аҙ бүленә. Һоралған биш йөҙ миллион һумдың ни бары етмеш бише генә республикаға бирелгән. Һөҙөмтәлә бушлай тәьмин ителергә тейеш пациенттар ҡиммәтле дарыуҙарҙы үҙ иҫәбенә алырға мәжбүр.
Президиум ултырышында яуаплы ведомствоға хәлде оҙаҡҡа һуҙмайынса көйләү бурысы ҡуйылды. Сөнки ташламалы дарыуҙарға дәғүә итеүсе граждандар республикала өс йөҙ меңдән ашыу. Уларҙың күптәре өсөн дарыуҙар йәшәү сығанағы. Ә улар ғәҙәттә сит илдәрҙән килтерелә һәм ябай кеше һатып алырлыҡ түгел.
