16 май Мәжит Ғафури исемендәге Башҡорт дәүләт академия драма театрында Алмас Әмиров ижадташ дуҫтарын йыйып, юморға бай тамаша ойоштора. Сара барышында үҙе ҡуйған һәм уйнаған спектаклдәрҙән өҙөктәр, ҡыҙыҡлы сәхнәләштереүҙәр буласаҡ.
Шулай уҡ Алмас Хәҙис улы тамашасылар алдына яңғыҙ сығып та, шаяртыуҙары аша барыһын да көлдөрөргә йыйына. Сәхнә оҫтаһын алтын юбилейы менән ҡотларға билдәле йырсылар, рок, джаз төркөмдәре лә киләсәк. Әлегә ике сәғәт ярымлыҡ тамашаға әҙерлек етди бара, артистар көн һайын репетицияларҙа.
Алмас Әмировтың Мәжит Ғафури исемендәге Башҡорт дәүләт академия драма театрында эшләй башлауына сирек быуаттан ашыу ваҡыт үтеп киткән. Алтын юбилейын ҡаршылаусы артист барлығы йөҙҙән ашыу роль башҡарған, тамашасыларҙы ул тағы ла яңы образдары менән ҡыуандырырға ниәтләй. Күп яҡлап талант эйәһе хаҡында хеҙмәттәштәре лә тик яҡшы фекерҙә.
