Советтар Союзы Геройы иҫтәлегенә арнап...

Кушнаренко районында Фазылйән Әхмәлетдиновтың тыуыуына 100 йыл тулыуға арналған юбилей саралары үтә. Герой иҫтәлегенә Әхмәт ауылында ҙур концерт программаһы әҙерләнде. Уның сиктәрендә Бөйөк Ватан һуғышы ветераны ҡәберенә сәскәләр һалынды, шишмәгә Герой исеме бирелде. Ауыл урамы буйлап "Үлемһеҙ полк" парады үтте.

Йортҡа килеп инеү менән үҙеңде музейға эләккәндәй тояһың. Бөйөк Ватан һуғышы йылдарын сағылдырған күренеш: һалдат кейемдәре, хаттар, аҡлы-ҡаралы фотоһүрәттәр. Атай хәтирәләрен ҡәҙерләп һаҡлаған балалары алмашлап, төрлө яҡтан килгән мәктәп уҡыусыларына, яҡташтарына бай йөкмәткеле экскурсия ойоштора.

Тальян гармунда уйнаны. Беҙ сиратлап йырлай, бейей торғайныҡ. Әле лә шул заманды һағынып иҫкә алабыҙ.

Зөһрә Әхмәлетдинова, Фазылйән Әхмәлетдиновтың ҡыҙы

Ун балаға ғүмер биргән Әхмәлетдиновтарҙың йорт нигеҙе ныҡлы. Гүйә, кисә генә ихатала уйнап йөрөгән ун балаһы ситкә таралышмаған да, һаман да ата-әсә йортонда иркәләнә, улар менән хаҡлы ғорурлана. Фазылйән Фазыл улы Бөйөк Ватан һуғышының тәүге көндәрендә үк фронтҡа алына. Ауыр һуғыш йылдарында буласаҡ тормош иптәше менән таныша, Мең туғыҙ йөҙ ҡырҡ бишенсе йылдың мартында уға тиңһеҙ батырлығы өсөн Советтар Союзы Геройы исеме бирелә.

Атайым менән әсәйем дауаханала танышҡандар. Әсәйем Әхмәт ауылына шәфәт туташы булып ебәрелгән булған. Атайым уға көн дә яраһын бәйләтергә йөрөгән. Шул ваҡытта улар танышып, ҡауышып алғандар.

Рәхимә Әхмәлетдинова, Фазылйән Әхмәлетдиновтың ҡыҙы

Бөйөк Еңеүҙе яҡынайтыуға үҙ өлөшөн индергән Фазылйән Әхмәлетдиновтың йорто бөгөн бала-саға тауышына күмелгән. Ейән-ейәнсәрҙәре, бүләләренең һаны биш тиҫтәнән ашҡан. Йыл һайын шәжәрә ағасы арта ғына, тип һөйөнә улар.

Бәләкәй саҡта бында күмәкләшеп йыйыла торғайныҡ. Беҙгә күпләп тәмлекәстәр бирәләр ине. Ошонда уйнап, ашап, күңел асып үҫтек. Хәҙер беҙ тағы ла күберәк, өйгә лә һыймайбыҙ, хатта.

Венера Мөфтиева, Фазылйән Әхмәлетдиновтың ейәнсәре

Советтар Союзы геройының тыуыуына йөҙ тулыу уңайынан ауылдағы шишмә сүп-сарҙан таҙартылып, уның исеме бирелде. Сөнки Фазылйән Фазлый улы үҙе тере саҡта шул шишмәгә йөрөп, уның һыуын эсергә яратҡан.

Һуғыштан һуң Фазылйән Әхмәлетдинов ауыл мәктәбендә байтаҡ йылдар директор урынбаҫары булып эшләй. Йәмәғәт эштәрендә әүҙем ҡатнаша. Шуға ла бөтә ауыл халҡы өсөн Советтар Союзы геройы үҙ миҫалында өлгө булып тора.

Үҙенең балалары ла шундай берҙәм. Күмәкләшеп байрам ойоштороуға тотондолар. Бер йыл элек әҙерлек башланыҡ. Һәр саҡ бергә йыйылып, һөйләшеп торҙоҡ.

Зилә Ялаева, Әхмәт ауылы биләмәһе башлығы

Герой йәшәгән йорттан халыҡ ағымы өҙөлмәй, тирә-яҡта йәнлелек.

Еңеү көнө алдынан Әхмәт ауылында уҙғарылған байрам туғандарҙы, яҡташтарҙы бер майҙанға йыйҙы. "Үлемһеҙ полк" акцияһы урам буйлап уҙып, тыныслыҡ өсөн үҙ көстәрен һалған яугирҙарҙы иҫкә алды.

Автор: Фәниә Юланова.