Банкротлыҡ

Суд приставтары 1-се төркөм инвалидының пенсияһынан бурыс өсөн аҡса тотоп алып ҡалған.

Рәшит Сәми улы апрель айында пенсияһының яртыһын ғына ала. 1-се төркөм инвалиды яман шеш ауырыуынан интегә. Элек ул шәхси һаҡ ойошмаһын етәкләгән. Ауыр сир арҡаһында ҡасандыр алған кредитын ҡайтара алмай башлаған. Ошо һәм башҡа сәбәптәр иҫәпкә алынып ул былтыр Арбитраж суд ҡарары менән банкорт пенсионер тип танылған булған.

Пенсия артынан почтаға барғайным, яртыһын суд приставтары алып ҡалды тинеләр. Башҡа сүкеш менән һуҡҡандай булды был хәбәр. Былай ҙа пенсия күп түгел ине.

Рәшит Бәширов, пенсионер

Кәрәкле инстанцияларға мөрәжәғәт иткәс кенә Рәшит Бәшировтан суд приставы ғәфү үтенде һәм сумманы кире ҡайтарасаҡтары тураһында белдерҙе.

Фирма үҙ иҫәбенән аҡсаны пенсия фондына ебәрә, пенсия фондынан ул пенсионерға түләнәсәк. Бында туранан-тура ғәйебе булмаһа ла, Ленин районы суд приставтары ғәфү үтенде.

Ләйсән Ноғоманова, Суд приставтары федераль хеҙмәтенең Башҡортостан буйынса идаралығы бүлеге етәксеһе

Автор: Рәмилә Исмәғилева.