Бөгөн республиканың төп баҫмаһы сит илдең "Аньхой провинцияһы" гәзите менән хеҙмәттәшлек тураһында килешеү төҙөнө. Документҡа ярашлы, Ҡытайҙа сыҡҡан гәзиттә лә Башҡортостан тураһында мәғлүмәттәр биреләсәк. Бынан тыш, яҡтар араһында телевизион бәйләнештәр ҙә нығый. Ошо көндәрҙә беҙҙең каналда "Аньхой" телевидениеһы көндәре башлана.
Был ике республика араһындағы хеҙмәттәшлекте киңәйтеү, иҡтисади бәйләнештәрҙе мәғлүмәти яҡтан да нығытыу маҡсатында эшләнә.
Башҡортостан юлдаш телевидениеһы эфирында Ҡытай яңылыҡтары. Сит илдең ССТВ каналы хәбәрселәре аҙнаһына бер тапҡыр үҙ илендә булған хәбәрҙәр, социаль-иҡтисади ҡаҙаныштары тураһында һөйләй.
БСТ каналында ла Ҡытайҙарға яуап әҙерләнә. Беҙҙең хәбәрселәр ҙә шулай уҡ аҙнаһына бер Башҡортостандағы хәл-ваҡиғалар менән сит ил тамашасыларын таныштыра. Ә улар әҙ түгел. Майҙаны менән Башҡортостан ҙурлыҡ булһа ла Аньхой провинцияһында 70 миллионға яҡын кеше йәшәй. Тимәк, республика данын таратыу йәһәтенән был хеҙмәттәшлек ҙур роль уйнай.
Ҡытайҙар телекоммуникациялар өлкәһендәге бәйләнештәрҙе тағы ла нығытмаҡсы. Башҡортостан юлдаш телеканалында Аньхой провинцияһы телевидениеһы көндәре ойошторолоуы ла ошоға дәлил. 14 май башланасаҡ сараны асыуға сит илдән киң мәғлүмәт саралары белгестәре килде. Аҙналыҡта Ҡытай тураһында төр лө тапшырыуҙар күрһәтеләсәк.
Мәғлүмәти мөнәсәбәттәр ваҡытлы матбуғат саралары кимәлендә лә үҫешәсәк. Ҡытайҙар республиканың төп баҫмаһы- "Республика Башҡортостан" гәзите менән дә яңылыҡтарын бүлешмәксе. Әлбиттә, был хеҙмәттәшлек яуапһыҙ ҡалмай. Бөгөн төҙөлгән килешеү нигеҙендә материалдар ике яҡтың баҫмаһында ла сағылыш табырға тейеш.
Яҡтар фекеренсә, мәғлүмәти оҙатыу төрлө өлкәләге хеҙмәттәшлекте лә нығыта ғына. Шуға ла киләсәктә интернет , китап баҫытырыу өлкәһендәге бәйләнештәрҙе әүҙемләштереү күҙаллана.
