Яугирҙарҙың вариҫтары ауыл урамдары буйлап "Үлемһеҙ полк" сафында атлап уҙҙы. Еңеү көнөнә арналған байрам сараһы тураһында беҙҙең сайтта уҡығыҙ.
Башҡортостан тыуған Ватанын ҡаһармандарса яҡлаған батырҙар төбәге. Республикала йортона һуғыш еле ҡағылмаған бер генә ғаилә лә юҡ тиһәк, һис тә хата булмаҫ. Хәйбулла халҡы ла ил менән бергә барлыҡ фронттарҙа һәм алыштарҙа тиңһеҙ ҡаһарманлыҡ күрһәтә. Завод-фабрикаларҙа, төҙөлөштәрҙә һәм ауыл хужалығында фиҙаҡәр хеҙмәте менән еңеүҙе яҡынайта.
Төбәктән фронтҡа киткән биш меңдән ашыу яугирҙың күбеһенә кире әйләнеп ҡайтырға насип булмай. Бөгөн районда ни бары туғыҙ Бөйөк Ватан һуғышы ветераны иҫән. Шуларҙың дүртеһе генә орден-миҙалдарын сыңлатып байрам түрендә ултырҙы. Быйыл район кимәлендәге сараға беренсе тапҡыр төрлө ауыл биләмәләренән тыл ветерандары, һуғышта ҡатнашыусыларҙың тол ҡалған ҡатындары һәм балалары саҡырылды.
Хәйбулла районында бынан бер нисә йыл элек хәтер стенаһы булдырылған. Диуарҙа еңеү менән ҡайтҡандар, ситтә башын һалғандар, хәбәрһеҙ юғалғандар, тыл ҡаһармандарының фотоһүрәттәре урын алған. Хәтер стенаһы йыл һайын тулыланып тора. Быйыл бында тағы ла алтмышҡа яҡын фотоһүрәт өҫтәлгән.
Хәйбуллалар шулай уҡ ауыл урамдары буйлап "Үлемһеҙ полк" сафында ла атлап уҙҙы. Йыл һайын ойошторолоп килгән акцияла яугирҙарҙың вариҫтары ветерандарҙы хөрмәтләп иҫкә алды, ейән ейәнсәрҙәренә, бүлә-бүләсәләренә улар хаҡында һөйләне. Был изге эш алдағы йылдарҙа ла дауам итәсәк.
