Бөгөн Рәсәйҙә Урман ултыртыу көнө. Бөгөн дәүләт эшмәкәрҙәре, төрлө ведомство вәкилдәре, студенттар Георгий Рутто исемендәге паркта 300 ҙән ашыу ҡарағай үҫентеһе ултыртты.
Шәмбе иртәһендә Лимонарий ҡаршыһындағы паркта республика хөкүмәте, министрлыҡ һәм ведомство вәкилдәре йыйылды. Ҡулдарына ғәҙәттә, ҡәләм генә тотоп эшләргә күнеккән дәүләт эшмәкәрҙәре көрәк, биҙрә тотоп эшкә кереште. Тәү ҡарашҡа, классик костюмда йөрөүселәрҙе танырлыҡ та түгел. Һәр кем изге эштә ҡатнашырға, үҙ өлөшөн индерергә тырышты. Берҙән, ҡарағайҙар ҡала уртаһында саф һауа сығанағы буласаҡ, икенсенән - иҫтәлек.
Урмансылар иһә кәңәштәрен еткерҙе. Ылыҫлы ағас ергә ерегеп китһен өсөн үҫентене ултыртҡанда ботаҡтарын көньяҡҡа ҡаратырға кәрәк. Көн һайын йәмәғәт эшендә ҡайнаусылар өсөн ағас ултыртыу ят эш түгел, уларҙың да үҙ донъяһы бар. Ә күптәре өсөн баҡсасылыҡ яратҡан шөғөл.
Акция өсөн Өфө, Стәрлетамаҡ, Архангел районы питомниктарынан 300-ҙән ашыу ҡарағай үҫентеләре килтерелгән. Ә ағас ултыртыу урыны итеп тап Георгий Рутто исемендәге паркты һайлау осраҡлы түгел. 1950 йылда булдырылған ҡала баҡсаһы ташландыҡ хәлдә. Быйылдан уны тергеҙеү эше башланды. Өмәгә килеүселәр ағас ултыртып ҡына ҡалманы, парк биләмәһен һынған, ҡороған ағастарҙан да таҙартты.
Ағас үҫентеләре ултыртыу республика урмансылыҡ хужалыҡтарында 19 майға тиклем дауам итә. Экологик акциянан Рәми Ғарипов исемендәге 1-се республика башҡорт гимназияһын тамамлаусылар ҙа ситтә ҡалманы. Улар ҡарағайҙарҙың береһенә "Рәми ҡарағайы" исемен бирергә ҡарар ителде.
