Хәйбулла районы аграрийҙары алдында быйыл 80 мең гектарҙан ашыу ерҙә сәсеү эштәрен башҡарыу бурысы ҡуйылған. Мең ярым гектар майҙан "Таймаҫов" крәҫтиән-фермер хужалығына тура килә.
Бынан 10 йыл элек барлыҡҡа килгән крәҫтиән-фермер хужалығы әле районда тотороҡло эшләп килгән хужалыҡтарҙың береһе. Былтыр, мәҫәлән, гектарынан уртаса егерме центнер уңыш алынған. Быйылғы яҙҙың үҙенсәлекле килеүен иҫәпкә алып, күптәр әле сәсеүгә төшөүгә иртәрәк тип билдәләһә лә, был хужалыҡ эшсәндәре тупраҡтың дымлы сағында сәсеп ҡалырға хәл итә.
Сәсеүлек майҙандарының төп өлөшөн арпа, бойҙай, һоло кеүек культуралар тәшкил итә. Һуңғы йылдарҙа был культураларҙың күп сығым талап итеүен күҙ уңында тотоп, башҡа төрлө культуралар ҙа сәселә башланған. Быйыл бер нисә йөҙ гектар ерҙе көнбағыш, ҡарабойҙай, нут өсөн бүлеү ҡаралған. Хужалыҡта эшсән коллектив эшләй. Күп йыллыҡ тәжрибәнән күренеүенсә, орлоҡсолоҡ мәсьәләләре тураһында даими хәстәрлек күреү, тейешле технологияларҙы күҙәтеү үҫтерелгән уңышта сағылмай ҡалмай.
