Йыл башынан алып Башҡортостанда 130 кеше сысҡан биҙгәге йоҡторған. Был күрһәткес үткән йыл менән сағыштырғанда, кәмерәк, әммә тынысланырға ярамай, сөнки ҡыштың ҡарһыҙ һәм яҙҙың һуңлап килеүе арҡаһында геморрагик биҙгәктең көслө мәле лә йәй аҙағында ғына көтөлә, ти белгестәр. Дөйөм алғанда, сысҡан биҙгәге йоҡтороу осраҡтары республикала арта һәм быға ябай ғына һаҡланыу ҡағиҙәләре үтәлмәүе сәбәпсе.
Ер эштәре ҡыҙған мәл. Баҡсасылар, ауылда йәшәүселәр оҙайлы ҡыштан һуң йорт-ҡаралтыһын сүп-сарҙан таҙарта. Ләкин тап ошо мәлдә төрлө сирҙәр йоҡтороу ихтималлығы көсәйеүен күптәр уйлап та бирмәй. Иң хәүефлеһе халыҡ телендәге сысҡан биҙгәге.
Тап вайымһыҙлыҡ күңелһеҙ хәлдәргә килтерә лә инде. Ә бит ни бары ябай ҡағиҙәләрҙе генә үтәү шарт. Тәү сиратта үҙ-үҙеңдең сәләмәтлегеңә ҡарата һаҡсыл ҡараш.
Әле баш ҡаланың йоғошло ауырыуҙар дауаханаһында ғына геморрагик биҙгәк билгеләре менән ун ете кеше ята. Бер кешелә сир иҫбатланған. Әле ул реанимацияла. Шуға күрә был осорҙа хәл киҫкенләшмәҫ борон үҙеңде насар тойған осраҡта ла табиптарға мөрәжәғәт итеү хәйерлерәк. Сөнки геморрагик биҙгәктең үҙенә генә хас билгеләре юҡ.
Башҡортостан тотош илдә геморрагик биҙгәктең иң көслө ерендә урынлашҡан. Төбәктәге кимереүселәрҙең 8 проценты тиерлек был сирҙе йөрөтә. Шуға ла урманға сыҡҡан һәр кем сысҡан биҙгәген йоҡтороуы ихтимал.
Йыл башынан алып республикала 130 кеше геморрагик биҙгәк менән дауаханаға эләккән. Статистика мәғлүмәттәренә ярашлы, сирҙе йышыраҡ ирҙәр йоҡтора. Быға йыуылмаған ҡул менән тәмәке тартыу сәбәпсе. Ауырыу ҡулдан тура үпкәләргә инеп ултыра.
