Башҡортостандың халыҡ артисы Алмас Әмиров юбилей кисәһен уҙғарҙы. Мәжит Ғафури исемендәге Башҡорт дәүләт академия драма театрында сәхнә оҫтаһының ижадын һөйөүселәр актер ҡуйған һәм уйнаған спектаклдәрҙән өҙөктәр, ҡыҙыҡлы сәхнәләштереүҙәр ҡараны. Тамашала уның ижадташ дуҫтары ла сығыш яһап, музыкаль күстәнәстәрен бүләк итте.
Алмас Әмировты коллегалары яуға оҙатҡандай, илле йәшенә оҙатты. Алтын юбилейын ҡаршылаусы талант эйәһе, әлбиттә, быға ҡаршылашты. Ҡырҡтағы тиҫтерҙәренән бер ҙә айырылғыһы килмәй. "Ваҡыт тигәнең күҙ асып йомған арала үтеп тә китә икән,"-тине ул бер аҙ шаяртып тамашасыларға. Ғүмеренең яртыһы ла тап ошо сәхнәлә, Мәжит Ғафури исемендәге Башҡорт дәүләт академия драма театрында үткән. Ошо ваҡыт эсендә ул Башҡортостандың халыҡ артисы, Шәйехзада Бабич исемендәгә республика дәүләт йәштәр премияһы лауреаты тигән маҡтаулы исемдәргә лайыҡ була.
Алмас Әмировты юбилейы менән ҡотларға яҡташтары - учалылар ҙа килгәйне. Шулай уҡ ижадташ дуҫтары, курсташтары ла уға сәхнәлә изге теләктәрен еткерҙе. Талант эйәһенә Башҡортостан Хөкүмәтенең һәм Мәҙәниәт министрлығының Почет грамоталары ла тапшырылды. Уңыш артынан уңыш. Әйткәндәй, артист сирек быуат эсендә генә йөҙҙән ашыу роль башҡарып өлгөргән
Алмас Әмировтың юбилей кисәһендә көлмәй ултырыу мөмкин түгел ине. Арбай белә ул тамашасыны. Ҡарашы, һүҙе менән кешенең йөрәгенә, күңел ҡылдарына үтеп инә.
Байрам тамашаһы бер тынала үтте. Алмас Хәҙис улы алтын юбилейында көлдөрҙө лә, илатты ла, бейетте лә... Әммә иң мөһиме сәхнә оҫтаһы тағы ла яңы образдары менән ҡыуандырырға вәғәҙәләне.
