Дәүләт башлығы Указына ярашлы, премьер-министр Дмитрий Медведевтың беренсе урынбаҫары итеп Антон Силуанов тәғәйенләнде. Ул шулай уҡ фининс министры булып ҡалды.
2013 йылдан илдең Иҫәп палатаһы рәйесе булып эшләгән Татьяна Голикова хәҙер вице-премьер вазифаһына күтәрелде. Ә бына спорт өлкәһен контролдә тотоусы Виталий Мутко бынан ары төҙөлөш мәсьәләләре менән шөғөлләнәсәк.
Тәбиғи ресурстар һәм экология министры итеп Өфө дәүләт нефть техник университетын тамамлаусы Дмитрий Кобылкин тәғәйенләнде. Ул Ямал-ненец автономиялы округын етәкләгән ваҡытта Башҡортостан Башлығы Рөстәм Хәмитов менән берлектә ике төбәк араһында тығыҙ иҡтисади бәйләнештәрҙе үҫтерҙе.
Яңы составтың тәүге ултырышы киләһе аҙна башында Петербург иҡтисади форум алдынан үтәсәк.
