Әле бер төркөм егеттәр Архангел районының Ҡыҙыл Ырғыҙлы ауылында күнекмәләр үтә. Атта сабышыу, һыбай уҡтан атыу һәм һөңгө ырғытыу оҫталыҡтарын камиллаштыра. Бындай фестивалдәргә улар тәүгә бармай. Быға тиклем Ҡырғыҙстан һәм Ҡаҙағстанда үткән дала уйындарында ҡатнашҡаны бар.
Атым бар йүгәнем юҡ, тип йырланһа ла хәҙерге заманда хәл башҡаса, ти Динис Өмөтбаев. Киреһенсә, йүгән дә бар, эйәр ҙә, әммә сабышырлыҡ аттар табыуы еңелдән түгел. Бар ул, ләкин "Күскенселәр уйындарында" ҡатнашыу өсөн етеҙ юртаҡ булыуы ғына етмәй. Хәрби сафтарҙа үтеү, ылаҡ һәм башҡа бәйгеләрҙә ҡатнашыу өсөн әҙерлек тә кәрәк.
Ғөрөф-ғәҙәттәрҙе, милли үҙенсәлектәрҙе һаҡлап ҡалыу эшенә бик һирәк ат тотоусылар ғына аңлы ҡарашта. Егеттәр юртаҡтарҙы Архангел районы Ҡыҙыл Ырғыҙлы ауылында башҡорт тоҡомло аттар үрсетеүсе йүнсел Айгөл Усманованан барып тапҡан. Форсат тейәгәндә күнекмәләрҙе ике көнгә һуҙып аттарҙы мөмкин тиклем һөҙөмтәле файҙаланып ҡалырға тырыша. Сөнки Ҡаҙағстанда етди һынау көтә.
Уҡ атыу, һөңгө ташлау кеүек бәйгеләрҙә егеттәр һынатмаҫ. Сөнки "Мәргән уҡсы" ойошмаһы был күнекмәләрҙе йыш ойоштора. Тик бына һыбай үтәлгән һынауҙар башҡорт егеттәре өсөн ҡаты буласаҡ. Сөнки Ҡаҙағстанда уларҙы бөтөнләй таныш булмаған аттар көтә. Уларға өйрәнеү ҙә ваҡыт һәм таҫыллыҡ талап итә.
Ирмен тигән ир кешенең күңелендә эйәрле-йүгәнле ат ятыр. Йәғни, дәрт-дарман, ҡомар булырға тейеш. Әле егеттәрҙе тап шул дәрт кенә йөрөтә лә инде. Ә улар барасаҡ ерҙә бындай бәйгеләр, милли уйындар хөкүмәт кимәлендә ярҙам ителә. Шулай ҙа милли хәрәкәт тә әле саҡ аяҡҡа баҫып тора. Бәлки, киләсәктә кемдер дилбегәне үҙ ҡулына алыр.
