2014 йылдан тормошҡа ашырылған контракт нигеҙендәге адреслы ярҙам программаһында Ишембай районынан 160 ғаилә ҡатнашҡан. Быйыл социаль ярҙам тағы биш кешегә күрһәтеләсәк.
Һыйыр фермер хужалығынан шәхси ихатаға март айында күсерелә. Өс йәшлек мал яңы урынға тиҙ өйрәнә. Хужабикәне лә ят итмәй. Ишембай районы Ҡанаҡай ауылында йәшәүсе Ләйсән Сәғиҙуллина социаль контракт нигеҙендәге адреслы ярҙам программаһында ҡатнашып 40 мең һум күләмендә матди ярҙам алыуға өлгәшә. Был аҡсаға улар тағы 10 мең аҡса ҡушып һыйырлы була. Өҫтәүенә, бөйрәкәй быҙаулаған.
Сәғиҙуллиндарҙың йортонда ниндәй генә һөт ризығы юҡ. Табындарынан ҡаймаҡ, эремсек, сыр өҙөлмәй. Аҡты төрлө ҡамыр аштарын бешергәндә лә мул ҡулланалар.
Социаль программа быйыл да тормошҡа ашырыла. Матди ярҙам мохтажлыҡҡа ҡарап шәхсән билдәләнә. Аҙ тәьмин ителгән, күп балалы, шулай уҡ тәрбиәгә бала алған һәм ғаилә ағзаларының береһенең мөмкинлеге сикләнгәндәргә өҫтөнлөк бирелә.
Шәхси хужалыҡ тотоусылар, йәғни үҙ эшен булдырырға теләүселәр дәүләт менән өс йылға тиклем социаль килешеү төҙөй. Ғаиләләргә ныҡлап аяҡҡа баҫыу, һыйырлы булыу өсөн был ҙур ярҙам булып тора. Сәғиҙуллиндар мәҫәлән, һөт-ҡаймаҡлы ғына түгел, килем дә ала. Һыйырҙың быҙаулауы өҫтәмә бонус ҡына.
