Ул ғаилә йылына арналған ҙур театрлаштырылған концерт менән тамамланды. Тамаша берләшмәлә эшләгән ижади парҙар сығышы менән үрелеп барҙы. Улар барлығы 21 ғаилә.
Әйткәндәй, республика мәҙәниәт усаҡтары араһында иң күп пар тап Стәрлетамаҡ театр-концерт берләшмәһендә хеҙмәт итә. Улар араһында башҡорт драма театры асылғандан бирле эшләүсе Башҡортостандың халыҡ артистары Рафиға һәм Рауил Ғәлиндар, билдәле сәхнә оҫталары Рәйхана менән Миңлеғәле Хәсәновтар бар.
Тамаша барышында алтмыш өс йыл, шулай уҡ бер йыл йәшәүсе парҙар билдәләнде. Ғаиләләргә иҫтәлекле бүләктәргә ҡушып бер йыллыҡ абонемент тапшырылды. Ғөмүмән, 27-се ижад миҙгелендә башҡорт драма театры репертуары алты яңы сәхнә әҫәре менән тулыланһа, ә филармония 21 яңы концерт программаһын тәҡдим итте.
