Хәйбулла районында 5 класлы ғәҙәттән тыш янғын хәүефе иғлан ителде. Әлеге ваҡытта республиканың тағы ла бер нисә төбәгендә юғары әҙерлек тәртибе индерелгән.
Ут сығыу осраҡтарының артыуын иҫәпкә алып, бөгөн Өфөлә тәбиғи һәм техноген характерҙағы ғәҙәттән тыш хәлдәргә арналған кәңәшмә үтте. Унда билдәләнеүенсә, республикала быйыл 672 гектарҙа 82 урман янғыны теркәлгән. Былтырғы менән сағыштырғында, ике тапҡырға күберәк. Бер үк ваҡытта йорт-ҡураларҙың янып китеү осраҡтары шул уҡ кимәлдә һаҡлана. Әммә һәләк булыусылар ике кешегә артҡан. Фажиғәле хәлдәрҙе иҫкәртеү өсөн махсус хеҙмәттәрҙең берлектә эш итеүе мөһим. Был йәһәттән ғәмәлдәге ҡануниәтте камиллаштырыу талап ителә, тиелде осрашыуҙа. Шулай уҡ сығыш яһаусылар ирекле янғын һүндереү отрядтарының матди-техник базаһын нығытыу мәсьәләһен күтәрҙе.
Республиканың ҡайһы бер төбәктәрендә бөгөн янғындарға ҡаршы юғары әҙерлек тәртибе индерелгән. Был осорҙа яуаплы хеҙмәттәр граждандарҙы махсус режим ҡағиҙәләрен теүәл үтәргә саҡыра. Шулай уҡ осрашыуҙа һауа торошо тураһында мәғлүмәт тә тыңланды. Синоптиктарҙың фаразы янғындарҙың кәмеүенә килтерер тип көтөлә.
