Һәләтле балалар лагеры Өфө районынының "Йондоҙсоҡ" балалар лагерында урынлашасаҡ. Учреждение ошо маҡсатта йыл әйләнәһендәге эшмәкәрлеккә күсә, был бурысты 2020 йылдан тормошҡа ашыра башлау ҡаралған. Әле иһә лагерҙа йәйге ялды ойоштороуға әҙерлек бара.
Сағыу мендәр-юрғандар, заманса йыһаз, сағыу, яҡты бүлмәләр. "Йондоҙсоҡ"тоң яңы, күркәм корпустарында балалар өсөн бар уңайлыҡтар тыуҙырылған. Лагерь һәр бер сменала 500 уҡыусыны ҡабул итергә әҙер. Уларҙы оҙайлы уҡыу йылынан һуң мауыҡтырғыс һәм фәһемле программа ла көтә. Дүрт сменаның һәр береһе айырым темаға арнала. Мәҫәлән, тәүгеһе цивилизация буйынса, йәғни отрядта квест формаһында үҫеш бара.
Әле лагерҙа һуңғы әҙерлек эштәре бара, тикшереү органдары хәүефһеҙлек сараларын, шарттарҙы, һыу торошон тикшерә. Белгестәр әйтеүенсә, балалар ғүмеренә ҡурҡыныс янарға тейеш түгел. Сигнализация системаһын, ашхананы тикшереүҙән тыш, биләмәләге һәр ағасҡа тиклем ҡарап сығылған. Ете ҡайынды, серегән ботаҡтарҙы ҡырҡҡандар. Дауыл йә көслө ел мәлендә уларҙың ауыуы ихтимал. Лагерҙа быйылдан онлайн күҙәтеү системаһы ла эшләй, йәғни ата-әсәләр балаларҙың ялы нисек ойошторолоуын компьютер аша күҙәтә ала. Хужалар әйтеүенсә, әҙерлек 99 процент, бәпембәләрҙе сабып, серкәйҙәрҙе ағыуларға ғына ҡалған. Был һуңғы көндәрҙә башҡарыласаҡ эштәр. Корпустарҙа проблема юҡ, улар барыһы ла яңы. Киләсәктә ашхана төҙөү ҡарала.
Республика буйынса быйыл 3 меңгә яҡын ял-һауыҡтырыу лагеры эшләйәсәк, уларҙың 100-ҙән ашыуы ҡаланан ситтә, меңдән күберәге мәктәп янында, бер өлөш шифахана-профилакторийҙарҙа асыла, палатка формаһындағылары ла бар. Реестрҙы мәғариф министрлығының сайтында табырға мөмкин. Барлығы 400 меңгә яҡын баланың ялын ойоштороу ҡаралған.
Республика лагерҙарының һәммәһе лә 10 июнгә тиклем балларҙы ҡабул итә башлай. Белгестәр әйтеүенсә йәйге ял мауыҡтырғыс, файҙалы ғына түгел, хәүефһеҙ ҙә булырға тейеш.
