Баймаҡ районында сәсеү эштәре йылдам бара

Төбәк аграрийҙары сәсеүҙе ошо аҙна аҙағына тамамларға ниәтләй. Республика Хөкүмәте Премьер-министр урынбаҫары - Башҡортостандың ауыл хужалығы министры Илшат Фәзрахманов төбәккә эш сәфәре ваҡытында район хужалыҡтарында эш барышын юғары баһаланы.

Тармаҡ министры хужалыҡтарҙың матди-техник базаһы менән дә ҡыҙыҡһынды. Райондың уңышлы фермерҙарының береһе булған Айрат Шәрәфетдинов һуңғы йылдарҙа хужалыҡ автопаркын тулыһынса яңыртҡан.

Бөгөн баҫыу эштәренә 6 агрегат йәлеп ителгән. Хужалыҡта эшләгән 15 механизатор ятаҡтан урын, бушлай туҡланыу менән тәьмин ителгән.

Дүрт 744, ике К-700, алты агрегат, ике камаз йәлеп ителде. Бер сменала 90-100 гектар эшләйбеҙ.

Айрат Шәрәфетдинов, крәҫтиән-фермер хужалығы етәксеһе

Райондың "Күлтабан" комплексында ла эштәр ырамлы бара. Хужалыҡта сифатлы орлоҡ, техника төҙөклөгө тураһында ваҡытында хәстәрлек күрелгән.

Дөйөм алғанда, быйыл 84 300 гектар ерҙе сәсергә бурысыбыҙ тора. Был майҙанды 25 майға тамамларға уйлайбыҙ. Эштәр әүҙем бара, маҡтанырлыҡ.

Азат Шәрипов, Баймаҡ районы хакимиәте башлығының ауыл хужалығы мәсьәләләре буйынса урынбаҫары

Автор: Гөлдәриә Йосопова.