Лайыҡлыларға дәүләт наградалары

Бөгөн Республика Хөкүмәте йортонда бер төркөм хеҙмәт алдынғылары тәбрикләнде. Уларға Башҡортостан Башлығының Почет грамоталары, маҡтаулы исемдәр, Рәхмәт хаттары тапшырылды.

Бүләкләнеүселәр араһында төрлө тармаҡ белгестәре - һаулыҡ һаҡлау, мәҙәниәт, торлаҡ-коммуналь хужалыҡ хеҙмәткәрҙәре, төҙөүселәр, уҡытыусылар бар. Уларҙы Республика Башлығы хакимиәте етәксеһе Владимир Нагорный ҡотлап, -Төрлө тармаҡта эшләһәгеҙ ҙә, барығыҙҙы ла эшкә ҡарата яуаплылыҡ тойғоһо, юғары профессионализм кеүек сифаттар берләштерә. Тап һеҙҙең тырышлығығыҙ йәш быуынды үҙ өлгөгөҙҙә тәрбиәләүҙә, фиҙаҡәр хеҙмәтегеҙ республика үҫешенә булышлыҡ итә тип билдәләне. Дәүләт наградалары бөгөн биш тиҫтәләп хеҙмәткәргә тапшырылды.

Кешенең ғүмере циклдарға бүленә һәм күпмелер циклдан һуң ул үҙенең донъяһын түңәрәкләй, бөтөнлөк ала. Бөгөнгө награда минең тормошомда бер бөтөнлөккә килеү. Ғөмүмән, журналист – ул төрлө һөнәрҙәрҙең ҡушылмаһы һәм бөтә эште ул еренә еткереп эшләргә тейеш.

Зәйтүнә Ниғәмәтйәнова, Башҡортостандың атҡаҙанған матбуғат һәм киң мәғлүмәт саралары хеҙмәткәре

Был награда минеке генә түгел, ә бөтөн Бөрйән районы табиптарыныҡы. Бер-нисә йыл беҙҙең район бала табыу буйынса беренсе урында.

Флүрә Әлибәкова, Башҡортостандың атҡаҙанған табибы

Автор: Фәниә Юланова.