Башҡортостанда сит илдә йәшәүсе ватандаштарыбыҙҙы күсереп ҡайтарыу дәүләт программаһы эшләй башланы

Тәүге сертификаттарҙы бөгөн республиканың Ғаилә, хеҙмәт һәм халыҡты социаль яҡлау министрлығында тапшырҙылар. Белгестәр фекеренсә, программа ярҙамында йыл аҙағына тиклем республикаға 60 медицина хеҙмәткәре һәм уларҙың 120 ғаилә ағзаһы ҡайтарыласаҡ. Күҙалланыуынса, был аҙым белгестәргә булған ҡытлыҡ мәсьәләһен дә бер аҙ хәл итергә ярҙам итәсәк.

Беҙ республикаға юғары әҙерлекле кадрҙар йәлеп итергә тырышабыҙ. Белгестәрҙең ғаилә ағзаларының да күсеп ҡайтыуы миграция үҫешенә лә булышлыҡ итә.

Ленара Иванова, Башҡортостандың ғаилә, хеҙмәт һәм халыҡты социаль яҡлау министры

Программала ҡатнашыусы сертификаты күсеп ҡайтыусыларға ябайлаштырылған ысул менән гражданлыҡ алырға, документтар юлларға, аттестацияны кире үтергә, сит илдә алынған дипломдарҙы иҫбатларға ярҙам итәсәк.

Шулай уҡ финанс ярҙамға мохтаждарға федераль бюджет иҫәбенән 20 мең һум күләмендә аҡса түләнәсәк. Матди ярҙамды ғаилә ағзалары ла аласаҡ.

Программа ярҙамында гражданлыҡ алыу программаһы күпкә ябайлашты. Хәҙер иркенләп эшләргә, йәшәргә, балалар үҫтерергә мөмкин.

Лилиә Лежайская, ватандаштарҙы күсереп ҡайтарыу дәүләт программаһында ҡатнашыусы

Автор: Фаягөл Дәүләтйәрова.