Башҡорт дәүләт аграр университетының студент төҙөлөш отрядтары республика хужалыҡтарына оҙатылды. Унда йәштәр баҫыу эштәрендә ҡатнашасаҡ, малсылыҡ өлкәһендә лә эшләйәсәк.
Комбайн төҙөлөшөн студенттар кеше анатомияһын өйрәнгән кеүек тикшерә. Һәр шөрөптөң үҙ урыны. Бигерәк тә заманса ауыл хужалығы техникаһында. Юғары кимәлдәге белгес әҙерләү өсөн барлыҡ яңылыҡтарҙы ла ваҡытында үҙләштереү мөһим. Башҡорт дәүләт аграр университетында был мәсьәләгә етди иғтибар бүленә. Йәштәр техника төҙөлөшөн өйрәнеп кенә ҡалмай, уның менән идара итеү һәләтен камиллаштыра, руль артына ултырыу хоҡуғы биргән документтар менән тәьмин ителә.
Заманса синыфтарҙа белем үҙләштергән йәштәрҙе, уҡыу йылы аҙағында хеҙмәт семестры көтә. "Башаҡ" студент төҙөлөш отрядының даны республикала ғына түгел, тотош Рәсәйгә таралған. Башҡортостан йәштәрен Ҡырым, Тататарстан Республикалары, Воронеж һәм Ярославль өлкәләре баҫыуҙарында көтәләр.
Башҡорт дәүләт аграр университетының 3-сө курс студенты Нәғим Шәрипов "Башаҡ" отрядында икенсе хеҙмәт семестрын уҙғара. Тиҫтерҙәре менән берлектә ул быйыл Күгәрсен районының "Тәүәкән" ауыл хужалығы предприятиеһы баҫыуҙарында эшләйәсәк.
Юғары технологиялар дәүерендә йәшәйбеҙ. Шуға ла һәр белгестең юғары кимәлдә әҙерлек үтеүе мөһим. Был йәһәттән аудиторияларҙа алынған белем, хеҙмәт урынында ла нығытылырға тейеш. "Башаҡ" йәштәргә эш тәжрибәһе, тимәк даими үҙгәреп торған заман менән бергә атлау мөмкинлеге лә бирә,- ти Башҡорт Дәүләт аграр университеты уҡытыусылары.
