Өфөлә йәшәүсе Фәнүз Төхвәтуллин автомобиле булып та унда йөрөй алмай. Ул ғына ла түгел, хатта транспорт сараһын теркәү мөмкинлеге лә юҡ. Өҫтәүенә ул 4 йөҙ мең һумлыҡ машинаны алты йөҙ меңгә һатып алған. Ә кредиты менән бөтөнләй миллионға барып баҫҡан. Автомутлашыусылар тоҙағына нисек эләкмәҫкә? Яуап беҙҙең сайтта.
Өр яңы, сит ил маркалы, әммә йөрөргә генә ярамай. Йөрөр ине лә, юл инспекцияһында теркәп булмай. Сөнки двигателдең номерҙары техник паспорттағыһы менән тап килмәй. Ете айҙан ашыу автомобиль парковкала тора. Хәйер, Фәнүз Төхвәтуллин был машинала йөрөргә йыйынмай ҙа. Сөнки автомобиль ул түләгән аҡсаларға тормай. Сифаты буйынса түгел, хаҡы менән. Автоһәүәҫкәр 350 мең һумға транспорт һатып алам тип, бер миллион һумға бурыслы ҡалған.
Фәнүз Төхвәтуллин хәҙер нишләргә лә белмәй. Сөнки документтарҙа уның ҡултамғаһы тора. Тимәк автомобилде ул үҙ теләге менән ошо хаҡҡа һатып алған. Намыҫһыҙ автосалондар эше тап ошо йүнәлешкә ҡоролған да инде. Улар кешенең башын бутап, ышанысын яулап төп башына ултырта. Ә хоҡуҡи яҡтан уларҙың эшмәкәрлегенә бәйләнерлек түгел. Беҙҙең ижади төркөм дә күп тапҡырҙар юристар менән бергә бындай автосалондар ишеген шаҡыны. Ләкин һөҙөмтәһеҙ.
Батыусыларҙы ҡотҡарыу, ҡазаға тарыусыларҙың үҙ ҡулында ғына. Йәғни, сәйер эшмәкәрлек алып барған автосалондарҙы ситләтеп үтеүең хәйерлерәк, ти рәсми дилерҙар.
Йәғни, бушлай сыр ҡапҡан телендә генә. Намыҫлы эшләүсе барлыҡ салондар ҙа хаҡты бер сама билдәләй. Ә инде иҫ киткес ташламалар тәҡдим итәләр икән , уйланырға урын бар.
