Сара Шамонин ауылы ағинәйҙәр ҡоро башланғысы менән ойошторолдо. Байрамда башланғыс синыф уҡыусылары ла ҡатнашты. Бында"Кәкүк сәйе" легендаһы һөйләнде, ағинәйҙәр балаларҙы халҡыбыҙҙың элекке уйындарын уйнатты.
Өлкәндәр тәбиғәт уянған мәлдәге йолалар, ғөрөф-ғәҙәттәр менән таныштырҙы. Тамашаға килеүселәр ауылда эшләп килгән "Дарман" өлгөлө бейеү ансамбле бейеүҙәрен ҡараны. Ағинәйҙәр халыҡ йырҙарын башҡарҙы.
Сарала кескәйҙәр күңелендә милли рух уятыусы байрамды йыл һайын уҙғарыу кәрәклеге билдәләнде. Шамонин мәктәбендә халҡыбыҙ ғөрөф-ғәҙәттәрен тергеҙеү йүнәлешендә әүҙем эш алып барыла. Уҡыусылар кейеҙҙән кейем тегеү түңәрәгенә йөрөй. Шулай уҡ байрамда футболкаға милли һүрәттәр төшөрөү буйынса оҫталыҡ дәресе үткәрелде.
"Кәкүк сәйе"нә милли ризыҡтар ҙа бешереп килтерелгән. Башҡорт милли кейемдәренән күргәҙмә ойошторолдо. Балалар ағинәйҙәр эшләгән ҡашмау, селтәрҙәр һәм түшерелдектәр менән танышты, уларҙы кейеп тә ҡараны.
