Рәсәй дәүләтселеге тарихында эске эштәр органдары даими рәүештә йәмғиәттә тәртип һәм тыныслыҡтың ышаныслы гаранты булып сығыш яһаны. Полиция халыҡҡа иң яҡын тәртип һаҡлау структураһы. Был турала бөгөн Башҡортостан Башлығы республика эске эштәр министрлығы хеҙмәткәрҙәрен Рәсәй полицияһының 300 йыллығы уңайынан уҙған тантанала билдәләне.
Рәсәй Полицияһына 300 йыл тулыуға арналған тантанала залдағыларҙы республика башлығы тәбрикләне. Телмәрендә Рөстәм Хәмитов полицияның күрһәткестәренә туҡталды. Башҡортостан етәксеһе фекеренсә, тәртип һаҡлау органдарының тынғыһыҙ хеҙмәте һөҙөмтәһендә йәмғиәт именлеге һәм тыныслыҡ тәьмин ителә.
Башҡортостан башлығы республика эске эштәр органдарының матди-техник базаһын нығытыуға ла ҙур өлөш индереүен билдәләп үтте.
Башҡортостан Башлығы Указы менән хеҙмәтендәге ҡаҙаныштары, йәмәғәт тәртибе һәм именлеген тәьмин итеүгә индергән өлөшө өсөн ведомствоның бер төркөм хеҙмәткәрҙәре Республиканың Почет грамотаһы һәм Башҡортостан Башлығының Рәхмәт хаты менән дә бүләкләнде.
Залда ветерандар ҙа бихисап. Дәүләт ҡоролошо һәм сәйәсәт үҙгәреүгә ҡарамаҫтан, енәйәтселәр енәйәтсе булып ҡала. Уларҙы асыҡлау һәм зарарһыҙландырыу һәр ваҡыт тәртип һаҡлау органдарына эшкә килгән ҡыйыу егет һәм ҡыҙҙар иңенә төштө тип билдәләй Кушнареко районынан Рафаэль Мирғәлиев. Ул оҙаҡ йылдар төбәктә участка милиционеры булып эшләгән. Милиция полиция тип үҙгәртелеүгә ҡарамаҫтан эштең асылы шул килеш ҡала, ти тәртип һаҡлау органдары ветераны.
Башҡортостан полицияһы әле заман талаптары буйынса йыһазландырылған, һәр яҡлап әҙерлек үткән, ҡеүәтле структура. Был һүҙҙәрҙең хаҡлығына, байрам саралары уңайынан ойошторолған парадта шаһит булдыҡ. Ленин урамынан республика буйынса эске эштәр министрлығы подразделениелары тигеҙ сафта үтте.
Рәсәй полицияһының 300 йыллығы уңайынан тәртип һағында тороусыларҙы йәмәғәтселек һәм дини конфессиялар вәкилдәре лә тәбрикләне. Был һис кенә лә осраҡлы түгел. Эске эштәр органдары ойошторолған көнөнән алып, бөтә яҡлап та халыҡҡа иң яҡын тәртип һаҡлау структураһы булып ҡала.
