"Башҡортостан" дәүләт телерадиокомпанияһының мәктәп-студияһында 25 хеҙмәткәр профессиональ квалификацияны күтәреү курстарын үтте. Компания төбәктә тәүгеләрҙән булып һөнәри белем биреү эшмәкәрлеген алып барыуға лицензия алғайны. Хәҙер уның нигеҙендә хәбәрселәр, мөхәррирҙәр әҙерләү һәм квалификацияны күтәреү мөмкинлеге бар.
2016 йылда ғәмәлгә ингән һөнәри стандарттар эш биреүсегә предприятиены тейешле талаптарға яуап биргән хеҙмәткәрҙәр менән тәьмин итеү бурысын ҡуя. Шунлыҡтан уҡыу программаһында күп йылдар журналистика өлкәһендә уңышлы эшләп тә, махсус белеме булмаған хеҙмәткәрҙәр, йәштәр ҙә ҡатнашты.
Курстарҙы ойоштороусылар әйтеүенсә, уҡыу күптәргә белемдәрен яңыртып, бай тәжрибәләрен башҡалар менән уртаҡлашыу мөмкинлеге бирә. Һөҙөмтә телеканалда сыҡҡан программалар йөкмәткеһен тағы ла байытыр, һөнәри квалификацияны арттырыр, тигән маҡсатта эшләнә. Курстарҙа шулай уҡ Ҡырмыҫҡалы, Кушнаренко райондарында эшләп килгән радио, телевидение етәкселәре, хәбәрселәре ҡатнашты.
