Таланттар йондоҙлоғо

"Башҡортостан" дәүләт концерт залында ошо исем аҫтында етенсе асыҡ республика конкурсы уҙҙы. Концерт программаһы быйыл республикала барған Ғаилә йылына арналды. Төп геройҙары: һаулыҡ мөмкинлектәре сикләнгән балалар һәм үҫмерҙәр.

Ҡайһы бер сығыштарҙа балалар ата-әсәләре менән бергә сығыш яһаны. Мәҙәни бәйгегә төрлө төбәктәрҙән 400-ҙән ашыу ҡыҙҙар-малайҙар йыйылды. Йәмғеһе, ике йөҙҙән ашыу номер тәҡдим ителде.

2014 йылда был конкурста гран-при яулағайным. Унда мин ғаиләм менән “Үҙән буйы” йырын башҡарҙыҡ.

Айгөл Ибраһимова, "Таланттар йондоҙлоғо" конкурсы алып барыусыһы

Конкурстың маҡсаты – мөмкинлектәре сикләнгән балаларҙың ижади һәләттәрен үҫтереү, йәмғиәткә яраҡлаштырыу. Тап был конкурста күп балалар үҙҙәренә дуҫтар таба. Сәхнәлә дебют яһап, үҙҙәрендә яңы һәләттәр аса.

Саҡ ҡына күрмәгән, йә ишетмәгән балалар шул тиклем талантлы, тормошта ла улар ныҡ тырышып йәшәйҙәр. Был ата-әсәләр һәм педагогтар эше һөҙөмтәһе.

Гөлшат Ибраһимова, "Әсә йөрәге" төбәк йәмәғәт ойошмаһы рәйесе

Автор: Фәниә Юланова