Был уңайҙан Дәүләт Йыйылышы-Ҡоролтай ултырышында күләмле сараға әҙерлек мәсьәләләре барланды. Республика Конституция суды рәйесе Зөфәр Еникеев әйтеүенсә, әлеге ваҡытта юғары уҡыу йорто студенттары араһында ғилми-ғәмәли конференциялар үткәрелә башлаған. Шулай уҡ яңы уҡыу йылы башланыу менән мәктәп уҡыусыларының ижади эштәрен ҡабул итеү ҙә күҙаллана.
Башҡортостандың мәҙәниәт министрлығы ҡыҙҙар-малайҙар өсөн "Иң яҡшы видеоролик, публицистик очерк" бәйгеһен иғлан итәсәк. Конкурста ҡатнашыусылар үҙ һәләттәрен һүрәт төшөрөү буйынса ла һынап ҡарай ала. Әйткәндәй, юбилей уңайынан "Конституция - балалар күҙлегенән" исеме аҫтында яңы баҫма донъя күргәйне. Унда ҡыҙыҡлы, сағыу фәлсәфәүи экспозициялар урын алған. Конкурстың маҡсаты балаларҙы хоҡуҡи яҡтан тәрбиәләү, бәләкәйҙән законға таянып эш иткән граждандар итеп үҫтереү.
Ойоштороусылар әйтеүенсә, Башҡортостан Конституцияһы ҡабул ителеүгә 25 йыл тулыу уңайынан республика белем усаҡтарында тематик класс сәғәттәре, музейҙарҙа мәктәп уҡыусылары өсөн асыҡ ишектәр көнө уҙғарыу ҡаралған.
